Fundað er á öllum hæðum Alþingishússins þessa stundina vegna uppljóstranna Stundarinnar um ummæli þingmanna Miðflokksins og Flokks fólksins. Þingmenn sem Stundin hefur rætt við lýsa andrúmsloftinu í þinginu sem svo að mikil reiði og titringur ríki.

Hópur þingkvenna fundaði í morgun þar sem ummælin til umræðu, þær Inga Sæland, Oddný G. Harðardóttir og Silja Dögg Gunnarsdóttir, sem allar voru til umræðu á upptökunum. Þær sendu nú fyrir skemmstu frá sér eftirfarandi yfirlýsingu:

„Ummæli þau sem þingmenn Miðflokksins og Flokks fólksins létu falla 20. nóvember á Klaustri lýsa skammarlegum viðhorfum til kvenna og við lítum þau verulega alvarlegum augum.

Það er algjörlega ólíðandi að karlar í valdastöðum sýni slíka kvenfyrirlitningu og tjái sig á jafn niðrandi hátt um konur og samkynhneigða. Þá skiptir einu hvort um er að ræða pólitíska andstæðinga eða samherja.

Ummæli þessi opinbera viðkomandi þingmenn og dæma sig sjálf. Hegðun þeirra er ekki til þess fallin að auka virðingu almennings á Alþingi eða á stjórnmálamönnum og setur samstarf og trúnað í uppnám.

Við fordæmum ummælin og munum óska eftir því að málið verði tekið upp í forsætisnefnd.

Að lokum viljum við minna á eftirfarandi siðareglur sem við þingmenn höfum öll undirgengist:

Meginreglur um hátterni.
5. gr.
Alþingismenn skulu sem þjóðkjörnir fulltrúar:
a. rækja störf sín af ábyrgð, heilindum og heiðarleika,
b. taka ákvarðanir í almannaþágu,
c. ekki kasta rýrð á Alþingi eða skaða ímynd þess með framkomu sinni,
d. nýta þá aðstöðu sem þeim er veitt við störf sín með ábyrgum hætti,
e. ekki nýta opinbera stöðu sína til persónulegs ávinnings fyrir sig eða aðra,
f. greina frá öllum hagsmunum sem máli skipta og varða opinbert starf þeirra
og leggja sig fram um að leysa úr árekstrum sem upp kunna að koma með
almannahag að leiðarljósi,
g. efla og styðja grundvallarreglur þessar með því að sýna frumkvæði og fordæmi.

Hátternisskyldur. 7. gr. Þingmenn skulu í öllu hátterni sínu sýna Alþingi, stöðu þess og störfum virðingu.“

Bergþór Ólason, formaður umhverfis- og samgöngunefndar Alþingis, mætti ekki á boðaðan fund nefndarinnar í morgun klukkan níu. Bergþór hafði sig mikið í frammi með ljótu orðfæri á hittingi þingmannanna á Klaustri bar, þar sem hann meðal annars kallaði Ingu Sæland „fokking tryllta“ og „húrrandi klikkað kuntu“. Bergþór mun hafa hringt í Ingu í gærkvöldi og beðið hana afsökunar.

Aðrir þingmenn sem komu við sögu á fundinum á Klaustri mættu samkvæmt heimildum Stundarinnar til vinnu í morgun.