„Við þekkjum þess dæmi að börn hafi fæðst eftir 21. viku meðgöngu og lifað. Að ætla að leyfa fóstureyðingu þegar móðir hefur lokið meira en hálfri meðgöngu, bara því henni datt það í hug þá, er svívirðilegt.“
Þetta er haft eftir Ingu Sæland, formanni Flokks fólksins, á forsíðu Fréttablaðsins í dag. Tilefnið er fyrirhugað frumvarp Svandísar Svavarsdóttur heilbrigðisráðherra til heildarlaga um þungunarrof þar sem gert er ráð fyrir, í samræmi við tillögur ljósmæðra og fæðingarlækna, að þungunarrof verði leyft fram að 22. viku meðgöngu. Áður hafði fagfólk gagnrýnt frumvarpsdrög þar sem lagt var til að þungunarrof yrði almennt aðeins heimilt fram að 18. viku meðgöngu en eftir það eingöngu ef fóstur væri „ólífvænlegt“
„Þetta er svo sorglegt að ég trúi hreinlega ekki að verið sé að leggja þetta fram,“ segir Inga í Fréttablaðinu sem tekur þó fram að hún vilji leyfa þungunarrof fyrr í sérstökum tilvikum, t.d. þegar líkur eru á að fóstur sé fársjúkt eða látist skömmu eftir fæðingu.
Eins og Stundin greindi frá í síðustu viku hafa níu karlar og ein kona á Alþingi lagt fram frumvarp til breytinga á lögum um fæðingar- og foreldraorlof, þar sem mælt er fyrir um að kona sem gefur barn sitt til ættleiðingar við fæðingu þess fái greiddan fæðingarstyrk að upphæð 135.525 þúsund krónur á mánuði í sex mánuði.
Flutningsmenn eru úr Miðflokknum, Flokki fólksins og Sjálfstæðisflokknum en í greinargerð frumvarpsins kemur fram að fóstureyðing sé erfið og í mörgum tilfellum þungbær ákvörðun fyrir konur. „Tilgangur þessa frumvarps er að styðja konur sem taka ákvörðun um að gefa barn sitt til ættleiðingar við fæðingu, en þær hafa hingað til ekki notið sérstakrar aðstoðar af hálfu hins opinbera.“
Athugasemdir