Þingmenn fengu nýja heildarútgáfu Íslendingasagnanna að gjöf frá afmælisnefnd aldarafmælis fullveldis Íslands „m.a. til að geta uppfyllt eftirlitshlutverk sitt“.

Einar K. Guðfinssonfyrrverandi forseti Alþingis

Mynd: pressphotos.biz

Þetta kemur fram í svari Einars K. Guðfinssonar, formanns afmælisnefndarinnar, til Björns Levís Gunnarssonar, þingmanns Pírata, eftir að Björn spurðist fyrir um ástæður þess að þingmenn hefðu fengið bækurnar að gjöf. Eitt af hlutverkum afmælisnefndarinnar var að hafa umsjón með útgáfunni og samdi hún við Sögu forlag um útgáfuna. Að því er fram kemur í svarinu til Björns var verð á Íslendingasögunum frá útgefanda 29.900 krónur. Þannig voru bókagjafirnar til allra 63 þingmannanna á Alþingi samtals hátt í tveggja milljóna króna virði. 

Björn gagnrýnir þetta á Facebook-síðu sinni og hæðist að þeirri skýringu að gjöfin sé til að hjálpa þingmönnum að rækja eftirlitshlutverk sitt. 

„Mér dettur í hug mörg ódýrari úrræði til þess að ég geti sinnt því hlutverki. Til dæmis er kveðið á um stafrænt aðgengi í þingsályktuninni: "3. stuðla að heildarútgáfu Íslendingasagna á afmælisárinu svo að fornar bókmenntir Íslendinga séu jafnan öllum tiltækar, jafnt á bók sem stafrænu formi; " --- það væri hægt að gera eitt eintak aðgengilegt í bókasafni þingsins eða eitthvað og láta þingmenn fá stafrænt eintak til þess að rýna í innihaldið,“ skrifar Björn. „Ekki eins og þingmenn séu endilega sérfræðingar á þessu sviði og geti farið í einhvers konar prófarkalestur á útgefinni bók sem einhvers konar eftirá eftirlit. Nei, ég þarf ekki 30 þúsund króna bók á borðið hjá mér til þess að sinna mínu eftirlitshlutverki. 63 þingmenn þurfa ekki 1.890.000 kr. af almannafé í formi bóka til þess að sinna því hlutverki heldur.“