Ræstinga- og veitingafyrirtækið Dagar hf, sem áður hét ISS Ísland, skilaði 73,6 milljóna hagnaði í fyrra eftir skatt og greiddi út 759,7 milljóna arð til hluthafa. Þetta kemur fram í ársreikningi sem fyrirtækið skilaði á dögunum. Dagar eru nú í eigu Sands ehf, eignarhaldsfélags í meirihlutaeigu föður og föðurbróður Bjarna Benediktssonar fjármálaráðherra, þeirra Benedikts og Einars Sveinssona. 

Hagnaður Daga dregst umtalsvert saman milli ára, en árið 2016 nam hann 172,6 milljónum. Eins og Stundin greindi frá þann 5. mars síðastliðinn hefur fyrirtækið náð gríðarlegum árangri í útboðum hjá hinu opinbera, en ISS landaði 19 ræstingasamningum við ríkisstofnanir í fyrra og bauð allt að 70 prósentum lægra verð en aðrir þátttakendur í útboðunum. Tekjur jukust úr 4 í 4,7 milljarða milli ára og fjölgaði ársverkum úr 499 í 605.

Fram kemur í skýrslu stjórnar Daga að gert sé ráð fyrir hlutfallslega hægari vexti á ræstingasviði næstu árin en hins vegum örum vexti í veitingaþjónustu. „Félagið ætlar sér að vera leiðandi á þessum markaði,“ segir í skýrslunni auk þess sem fram kemur að langtímamarkmiðið sé „að koma á fót sérhæfðri þjónustu fyrir eignaviðhald sem í dag er að stórum hluta unnin innan stærri íslenskra félaga en er utan við meginstarfsemi þeirra.“ 

Sandur ehf. skilaði einnig nýlega ársreikningi fyrir árið 2017. Tap ársins nam 62 milljónum en hrein eign félagsins í árslok var 808,6 milljónir króna. Af ársreikningum Sands og ISS má ráða að arðurinn sem greiddur var út í fyrra hafi runnið til fyrrverandi hluthafa, rétt eins og sá 800 milljóna arður sem greiddur var út árið 2016, áður en hlutabréf skiptu um hendur. Fyrirtækið, sem nú heitir Dagar, mun ekki greiða út arð til Sands á þessu ári að því er fram kemur í skýrslu stjórnar.