Yair og Avner Netanyahu, synir forsætisráðherra Ísrael, Benjamin Netanyahu, eru staddir á Íslandi samkvæmt heimildum Stundarinnar.
Hinn 27 ára Yair hefur verið viðloðandi stjórnmál í nokkur ár, meðal annars í kosningabaráttu Likud föður síns til þingkosninga 2015. Hann er sagður hafa nokkur áhrif í ísraelskum stjórnmálum, en vakti uppnám í síðustu viku þegar hann birti á Instagram síðu sinni mynd af tyrkneska fánanum sem á stóð „Fuck Turkey“.
Yair hefur einnig sætt gagnrýni fyrir myndbirtingar á samfélagsmyndum sem taldar voru daðra við gyðingahatur, að sögn blaðsins Haaretz. Upptaka af ölvuðum Yair að ræða kynni við vændiskonur og spillingu föður síns í tengslum við borun eftir náttúrugasi var birt opinberlega í byrjun árs. Avner er 23 ára, lauk nýverið herskyldu og starfar sem þjónn á veitingastað í Jerúsalem.
Fyrstir til að fá lífverði
Í fylgd með bræðrunum eru lífverðir, en þeir eru fyrstu synir ísraelsks forsætisráðherra sem fá slíka aðstoð frá hinu opinbera. Fyrirkomulagið var umdeilt þegar það var kynnt og tryggir það þeim einnig bíl og bílstjóra, auk öryggisaðstoðar erlendis, að sögn The Times of Israel.
Ræðismaður Ísraels á Íslandi, Páll Arnór Pálsson, segir heimsókn bræðrana ekki vera opinbera og að hann hafi ekki verið látinn vita af henni fyrir fram. „Líklega vilja þeir hafa þetta bara sem prívat mál,“ segir Páll.
Athugasemdir