Lögð hefur verið fram þingsályktunartillaga á Alþingi um að öllum opinberum aðilum verði gert skylt að kolefnisjafna eldsneytisnotkun sína. Líkt og Stundin greindi frá í síðustu viku eru engin ráðuneytanna, engar ríkisstofnanir og aðeins sárafá fyrirtæki í eigu hins opinbera þátttakendur í Kolviði, sjóði sem hefur það verkefni að veita fyrirtækjum, stofnunum, félagasamtökum og einstaklingum færi á að gerast kolefnishlutlaus.
Vilhjálmur Árnason, þingmaður Sjálfstæðisflokksins, er flutningsmaður tillögunnar. Í henni segir að Alþingi feli forsætisráðherra beita sér fyrir innleiðingu reglna þar sem opinberum aðilum verði gert að kolefnisjafna sig. Í því skyni verði skipaður starfshópur sem geri tillögur að útfærslu slíkra reglna og verði meðal annars tekið mið að samningi þeim sem forsætisráðuneytið og Kolviður gerðu um kolefnisjöfnun bílaflota ríkisins árið 2008.
Í kjölfar efnahagshrunsins var samningur stjórnarráðsins við Kolvið ekki endurnýjaður og hefur eldsneytisnotkun ríkisins ekki verið kolefnisjöfnuð frá árinu 2009. Kostnaður við jöfnunina þau tvö ári sem verkefnið stóð, 2008 og 2009 nam um 15 milljónum króna á ári.
Hið opinbera gangi á undan með góðu fordæmi
„Flutningsmanni þessarar tillögu þykir tími til kominn að hið opinbera hefji aftur kolefnisjöfnun vegna eldsneytisnotkunar og telja ráðlegt að hver og einn opinber aðili beri ábyrgð á kolefnisjöfnun eldsneytisnotkunar sinnar, ólíkt því sem var 2008–2009. Flutningsmaður telur mikilvægt að hið opinbera gangi á undan með góðu fordæmi fyrir atvinnulífið og einkaaðila sem margir hverjir hafa þegar stigið þetta skref í samræmi við skuldbindingar í tengslum við Parísarsamkomulagið,“ segir þá í tillögunni.
Athugasemdir