Gísli Garðarsson, þriðji varaþingmaður Vinstri grænna í Reykjavíkurkjördæmi norður, Ugla Stefanía Kristjönudóttir Jónsdóttir, frambjóðandi flokksins í síðustu tvennum Alþingiskosningum og Margrét Pétursdóttir, stjórnarmaður í Vinstri grænum og fyrrverandi varaþingmaður eru á meðal þeirra sem tilkynntu um úrsögn úr flokknum eftir að flokksráð VG samþykkti að ganga til ríkisstjórnarsamstarfs við Sjálfstæðisflokkinn og Framsóknarflokkinn í gærkvöldi. 

„Nú er komið að vatnaskilum. Ég get einfaldlega ekki tekið þátt í þessari vegferð. Ég get ekki réttlætt samstarf við íhaldið fyrir sjálfum mér. Ég get ekki samþykkt það að skjóta hækju undir ráðherrastóla Bjarna Benediktssonar og Sigríðar Á. Andersen,“ skrifar Gísli Garðarsson á Facebook. Gísli hefur gegnt ýmsum trúnaðarstörfum fyrir Vinstri græn undanfarin ár, meðal annars sem flokksráðsfulltrúi og stjórnarmaður í Reykjavíkurfélagi flokksins, verið fulltrúi flokksins í ráðum og nefndum Reykjavíkurborgar og tvívegis fengið kosningu sem varaþingmaður.

„Íhaldið hefur aldrei viðurkennt svo mikið sem brotabrot af sinni ábyrgð á hruninu, Panamaskjölunum eða leyndarhyggjunni sem felldi síðustu ríkisstjórn. En síðast en ekki síst ber flokkurinn einn og nánast óstuddur alla ábyrgð á mengandi kapítalísku feðraveldissamfélagsgerðinni (og ekki einu sinni reyna að andmæla þessu síðasta, skoðið bara kynjahlutföllin í þingflokknum) sem við búum við í dag. Flokkurinn hefur svo gott sem verið óslitið við völd frá stofnun lýðveldisins. Hann skapaði ekki bara kerfið, hann er kerfið. Og við breytum ekki kerfinu með málamiðlunum við það sjálft. Við byltum ekki með því að halda ríkjandi öflum við völd,“ skrifar Gísli.

Ugla Stefanía Kristjönudóttir Jónsdóttir hefur vakið athygli fyrir baráttu sína fyrir réttindum transfólks og var í 5. sæti á lista Vinstri grænna í Reykjavíkurkjördæmi suður fyrir síðustu tvennar Alþingiskosningar.

Ugla segist hafa trú á að Katrín Jakobsdóttir og Svandís Svavarsdóttir standi sig vel í ríkisstjórn og verði samkvæmar sjálfum sér og stefnu flokksins. „Að því sögðu get ég ekki samþykkt ríkisstjórnarsamstarf VG við Sjálfstæðisflokkinn og Framsókn. Margar ástæður eru fyrir því og má þar helst nefna Panamaskjölin og málið sem sprengdi síðustu ríkisstjórn. Ég get einfaldlega ekki sætt mig við það að ákveðið fólk hljóti ráðherrastól og komist aftur til valda eftir allt sem hefur gengið á,“ skrifar Ugla. 

Margrét Pétursdóttir, stjórnarmaður í Vinstri grænum og fyrrverandi varaþingmaður, segir einnig frá því á Facebook að hún sé hætt í flokknum. „Tók þá ákvörðun á flokksráðsfundi í kvöld að segja mig úr Vinstri hreyfingunni grænu framboði. Treysti mér ekki í þennan leiðangur sem nýtt ríkisstjórnarsamstarf er. Óska þeim alls hins besta enda margt gott fólk þarna inni sem vill vel,“ skrifar hún. 

Málefnasamningur ríkisstjórnar Sjálfstæðisflokksins, Vinstri grænna og Framsóknarflokksins var samþykktur með 75 atkvæðum gegn 15 á flokksráðsfundi Vinstri grænna í gær og með meiri stuðningi í flokksstofnunum Sjálfstæðisflokksins og Framsóknarflokksins. Tveir þingmenn Vinstri grænna, þau Andrés Ingi Jónsson og Rósa Björk Brynjólfsdóttir, greiddu atkvæði gegn málefnasamningnum.