Hverjir eru hinir dularfullu Groddar? Dagbók frá Kaupmannahöfn XV.

Um dag­inn hjólaði ég niður á Íslands­bryggju hér í Kaup­manna­höfn og á leið­inni rakst ég þá á dul­ar­fullt skilti.

Þar stóð:

„Hér stigu Groddar á land haustið 1959.“

Tónninn var eins og þarna hefði stigið vík­inga­flokkur á land, en frek­ari skýr­ingar á þessu voru engar sjá­an­legar.

Þetta gat varla verið algjört rugl úr því skiltið fær að hanga uppi.

Nú hef ég fengið skýr­ingu á þessu hjá starfs­manni íslenska sendi­ráðs­ins hér í Kaup­manna­höfn, en hún er þó svo­lítið óljós.

Haustið 1959 mun hafa komið hópur íslenskra náms­manna til að setj­ast í háskóla í Kaup­manna­höfn. Þetta voru allt strákar, þeir voru góðir vinir og ætl­uðu að læra verk­fræði.

Þar sem flestir voru stórir og stæði­legir köll­uðu þeir sig í gamni Groddana.

Á þeim stað, þar sem skiltið er núna, þar lagð­ist Gullfoss að bryggju með Groddana inn­an­borðs.

Þeir lærðu svo sína verk­fræði eins og lög gerðu ráð fyrir og héldu heim­leiðis á ný.

Fyrir eitt­hvað um fimm árum eða svo voru þeir svo þarna á ferð í eins konar minn­ing­ar­reisu um náms­árin sín í Kaup­manna­höfn.

Orðnir rosknir menn, en léttir í lund.

Þeir höfðu látið útvega eins­konar lím­miða með þess­ari áletrun, „Hér stigu Groddar á land haustið 1959“, og þennan lím­miða límdu þeir yfir ein­hverja áletrun sem á skilt­inu var.

Og hafn­ar­yf­ir­völd í Kaup­manna­höfn hafa að minnsta kosti hingað til ekki séð neina ástæðu til að fjar­lægja þennan „minn­ing­ar­skjöld“.

Gaman væri að vita hversu nákvæm þessi útgáfa sög­unnar er, og hverjir Grodd­arnir eru í raun og veru.