Tvær erlendar konur sem mótmæltu hvalveiðum Íslendinga með því að klifra um borð í hvalveiðiskip í Reykjavíkurhöfn haustið 2023 og dvelja þar í meira en sólarhring voru sakfelldar og dæmdar til að greiða sekt upp á 200 þúsund krónur hvor og málskostnað.

„Þetta tapaðist,“ sagði Katrín Oddsdóttir, verjandi kvennanna, eftir að dómurinn var kveðinn upp. Hún sagði ekkert tjón hafa orðið af gjörðum kvennanna og að málið hafi varðað tjáningarfrelsi.

Hún sagði að konurnar mundu skoða að áfrýja í málinu. „Akkúrat núna eru þetta vonbrigði og ekki gott fyrir íslenskt réttarkerfi að mínu mati,“ sagði hún.

Sahar Babaei, íranskur ríkisborgari, og Elissa May Phillips, breskur ríkisborgari, voru ákærðar fyrir húsbrot og brot gegn lögum um siglingarvernd. Í september 2023 klifruðu þær upp í útsýnisturna í möstrum hvalveiðiskipanna Hvals 8 og Hvals 9 í eigu fyrirtækisins Hvals hf. og héldu þar til í 33 klukkustundir. Fyrirtækið kærði konurnar í kjölfarið.