Fyrrverandi formaður Framsóknarflokksins í Reykjavík, sem hætti í flokknum ásamt Sigmundi Davíð Gunnlaugssyni, mun flytja ræðu á fundi Íslands þvert á flokka á Austurvelli á laugardag.
Sveinn Hjörtur Guðfinnsson er skýrasta tengingin á milli hópsins Íslands þvert á flokka, sem staðið hefur fyrir mótmælum gegn umsækjendum um alþjóðlega vernd á Austurvelli, og Skjaldar Íslands, hóps manna sem hafa vakið athygli fyrir að ganga einkennisklæddir um miðborg Reykjavíkur til að fylgjast með meintum glæpum þessa þjóðfélagshóps.
Sveinn Hjörtur er stjórnarmaður og prókúruhafi Íslands þvert á flokka og einnig stjórnandi Facebook-hóps Skjaldar Íslands og hefur komið opinberlega fram fyrir hópinn í viðtölum. Hann hefur sinnt gæslu á mótmælum Íslands þvert á flokka ásamt fleirum, meðal annars öðrum talsmanni Skjaldar Íslands, Sindra Daða Rafnssyni, sem hlaut sex ára fangelsisdóm fyrir vopnað bankarán í Danmörku árið 1999.
Skjöldur Íslands breytti nýverið um merki en það fyrra var járnkrossinn sem var notaður af nasistum í Þýskalandi og nýnasistum seinna meir, þó að táknið hafi einnig aðrar og eldri skírskotanir. „Allt tal um rasista, nasista, þjóðernissinna og tengingu við merki okkar, letur og nafn hópsins er kjánaleg tilraun til að rakka okkur niður,“ sagði í yfirlýsingu Skjaldar Íslands til fjölmiðla.
„Múslimar farnir að ögra menningu þjóða, níða sögu þeirra og fara í hálfgert stríð“
Í yfirlýsingunni segir hópurinn umsækjendur um alþjóðlega vernd „níða og misnota samfélag okkar, innviði og menningu“ og segja ástandið stjórnlaust. „Um allan heim eru t.d. múslimar farnir að ögra menningu þjóða, níða sögu þeirra og fara í hálfgert stríð með sínum aðferðum sem eru þannig að fólki blöskrar,“ sagði ennfremur í yfirlýsingunni.
Umsóknum um alþjóðlega vernd fækkaði um meira en helming á milli áranna 2023 og 2024 og fóru úr 4168 í 1944. Þeim virðist ætla að fækka enn meira í ár en það sem af er ári hafa 629 borist en aðeins 87 manns verið veitt alþjóðleg vernd, samkvæmt tölfræði Útlendingastofnunar. Meira en helmingur umsókna í ár varða fólk frá Úkraínu, eða 337, en þar á eftir hafa 74 umsóknir borist frá venesúelskum umsækjendum og jafn mikið frá palestínskum.
Fylgdi Sigmundi Davíð úr Framsókn
Eins og Heimildin hefur greint frá hafa ræðumenn Íslands þvert á flokka leitað sjónarmiðum sínum farveg innan stjórnmálaflokka á Íslandi um nokkurt skeið.
Sveinn Hjörtur hefur lengi látið sig stjórnmál varða og var virkur í Framsóknarflokknum um tíma og studdi Sigmund Davíð Gunnlaugsson. Þegar Sigmundur Davíð tapaði í formannskosningum gegn Sigurði Inga Jóhannssyni árið 2016 og stofnaði Miðflokkinn lét Sveinn það verða sitt fyrsta verk að segja sig úr flokknum.
Hann bauð sig í kjölfarið fram fyrir Miðflokkinn í borgarstjórn Reykjavíkur og var þar varaborgarfulltrúi ásamt öðrum forsprakka Íslands þvert á flokka, Baldri Borgþórssyni. Báðir áttu eftir að segja sig úr flokknum, Sveinn árið 2021.
„Þessum kafla lífs míns er hér með lokið. Er ekki á leið í aðra flokka, ef einhver ætti það að vera yrði það HLH-flokkurinn,“ skrifaði hann á Facebook.
Í fyrra var Sveinn Hjörtur hins vegar búinn að skipta yfir í Lýðræðisflokkinn undir forystu Arnars Þórs Jónssonar og var kosningarstjóri flokksins fyrir kosningar í lok árs 2024. Þar var Baldur í framboði í 1. sæti á lista flokksins í Reykjavíkurkjördæmi norður.
Sigfús Aðalsteinsson, forsprakki Íslands þvert á flokka, hefur hins vegar stutt Sjálfstæðisflokkinn alla tíð. Hann hefur varið hópinn Skjöld Íslands og sagt hann „hóp sem lætur sér annt um Íslendinga og öryggi þeirra“.
Sigfús verður ræðumaður á fundinum á laugardag ásamt Sveini Hirti, Baldri, Davíð Bergmanni Davíðssyni unglingaráðgjafa og ónefndum ræðumanni sem einungis er titluð „áhyggjufull móðir“.
Athugasemdir