Halla Hrund Loga­dóttir, þing­maður Fram­sókn­ar­flokks og fyrr­ver­andi orku­mála­stjóri, sem bauð sig fram til for­seta vorið 2024, hefur aðeins sagt „nei“ við einu frum­varpi rík­is­stjórn­ar­innar.

Halla Hrund greiddi atkvæði gegn frum­varpi fjár­mála- og efna­hags­ráð­herra um opin­ber fjár­mál. 

Að öðru leyti hefur hún ein­ungis greitt atkvæði gegn breyt­ing­ar­til­lögum stjórn­ar­and­stöð­unnar í ein­staka málum, afbrigðum um lengd þing­fundar og því að frum­varpi um veiði­gjöld yrði vísað til atvinnu­vega­nefndar eftir 1. umræðu.

Halla Hrund hefur sagt „já“ í 69,5% atkvæða­greiðslna, nei í 5,2% þeirra og setið hjá í 16,1% til­vika. Flest mál­anna sem hún studdi eru stjórn­ar­frum­vörp en í mörgum þess­ara mála sátu stjórn­ar­and­stöðu­þing­menn hjá eða greiddu atkvæði gegn þeim.

Vill styttri ræðutíma og lengri undirbúning mála

Halla Hrund birti í gær færslu á Facebook um þennan fyrsta þing­vetur sinn þar sem hún hvatti til sam­vinnu­stjórn­mála að nor­rænni fyr­ir­mynd. Benti hún á að hún hefði ákveðið að taka ekki þátt í mál­þófi stjórn­ar­and­stöð­unnar í veiði­gjalda­mál­inu.

„Síðustu vikur þings­ins hafa vakið upp blendnar til­finn­ingar hjá mér,“ skrif­aði hún. „Ég vona að næst náist að ljúka þing­störfum þannig að sem mest sátt ríki á meðal þing­flokka. Betri bragur er á slíku en þeirri stig­vax­andi átakapóli­tík sem nú ræður ríkjum sem er óvið­un­andi og þingi ekki sæm­andi, sama hvaða flokki fólk til­heyrir. Við þurfum líka að gæta þess að halda skyn­sam­legu tungu­taki því það þjónar hvorki okkur né öðrum að líkja stöðu Íslands, frið­samasta ríki heims í alþjóð­legum sam­an­burði, við stríðs­á­stand eða að lýð­ræð­inu sé ógnað. Næg eru átökin í heim­inum þar sem slík orð­ræða á því miður við.“

„Næg eru átökin í heim­inum“

Benti hún á að hún hefði átt góð sam­töl við fólk í öllum flokkum, þar á meðal sessu­nauta sína Njál Trausta Frið­berts­son úr Sjálf­stæð­is­flokki og Snorra Másson úr Mið­flokki, auk þess að hafa lært mikið af Sigurði Inga Jóhanns­syni, for­manni Fram­sókn­ar­flokks­ins.

„Að mínu mati er sam­tal og sam­vinna mik­il­væg­asta aflið sem við þurfum að virkja,“ skrif­aði Halla Hrund. „Sjáum ekki óvini í hverju horni. Veljum aðra leið. Horfum heldur til sam­vinnupóli­tíkur Norð­ur­land­anna þar sem und­ir­bún­ingur mála er lengri með aðkomu ólíkra flokka og ræðu­tími í þing­inu því styttri. Ég þekki vel úr starfi mínu sem orku­mála­stjóri að frum­vörp geta tekið eitt til þrjú ár í und­ir­bún­ingi áður en þau verða að lögum. Það krefst þol­in­mæði og úthalds og mik­il­vægt er að horfa ekki ein­göngu á hraða afgreiðslu sem mæli­kvarða árang­urs. Best er að stíga vönduð skref í laga­setn­ingu auð­linda­mála sem stand­ast tím­ans tönn óháð því hvaða rík­is­stjórn situr, því árang­urs­rík og ábata­söm nýt­ing auð­linda krefst fyr­ir­sjá­an­legrar og traustrar umgjörðar.“