Þeir komu seint í höfn, strand­veiði­menn­irnir í Grinda­vík síð­ast­lið­inn mið­viku­dag. Svo seint að búið var að loka fisk­mark­aðnum. „Hann verður þá boð­inn upp á morgun sem dags­gam­all,“ segir einn þeirra, þar sem þeir hjálp­ast að við að landa fal­legum þorski og vænum ufsa. Vanalega fara þeir til sjávar eldsnemma morg­uns, en spáin hafði sýnt að skásti veð­ur­glugg­inn yrði frá hádegi og fram eftir. Nú var kom­inn kalda­skítur og margra daga bræla fram undan.

Diddi á Sigurvon ÁR121 hafði komið þeirra lang­fyrstur að bryggju. Hann var einn að bauka við að landa, prílandi ofan í bát­inn til að krækja í kör og aftur upp á bryggju til að hífa þau – þrjár umferðir. Erfitt er að koma inn fyrstur og standa einn í löndun. Dagskvóti strand­veiði­manns ætti að fylla þrjú kör, en Diddi, sem heitir fullu nafni Sigurþór Jónsson, segir aðstæður hafa verið erf­iðar og von­laust að fylla kvót­ann í …