Kjartan Þorbjörnsson, eða Golli, ljósmyndari Heimildarinnar fékk í dag verðlaun fyrir Mynd ársins 2024. Það eru Blaðaljósmyndarafélag Íslands sem veitir verðlaunin. Dómnefndin var einróma þegar kom að því að velja sigurmyndina. Eggert Jóhannesson, ljósmyndari á Morgunblaðinu og mbl.is, fékk verðlaun fyrir Fréttamynd ársins 2024. 

Verðlaunaafhendingin fór fram á Ljósmyndasafni Reykjavíkur í Grófarhúsi, en við sama tilefni ofnaði sýning Blaðaljósmyndarafélags Íslands undir yfirskrift Myndir ársins 2024. Þar er að finna 101 mynd frá 14 blaðaljósmyndurum sem valdar voru úr mörg hundruð innsendum myndum. Á sýningunni eru myndirnar í sex flokkum: fréttamyndir, daglegt líf, íþróttamyndir, portrettmyndir, umhverfismyndir, og myndaraðir.

Kjarnar eitt stærsta mál samtímans

Í umsögn dómnefndar segir að mynd Golla grípi strax og sé áhugaverð fyrir margra hluta sakir. Myndin er hluti af myndröð um flóttafólk frá Palestínu og mótmæli vegna framgöngu yfirvalda í málefnum þeirra.

„Hún kjarnar á vissan hátt eitt stærsta mál samtímans, stöðu flóttafólks í veröldinni. Börn og fjölskyldur sem búa við stöðuga ógn leita skjóls, sem oft er erfitt að finna. Barnið á myndinni er á stað sem heita má öruggur, en leitar þó athvarfs og á vissan hátt er táknrænt að barnið virðist vaxið upp úr skjóli sínu,“ segir í umsögn dómanefndar um mynd Golla. 

„Táknmynd sjálfstæðis, Jón Sigurðsson, vakir yfir og flugvélin gefur tengingu við umheiminn en minnir jafnframt á þá áframhaldandi ógn sem flóttafólk býr við, að geta átt von á því að vera sent úr landi. Myndin hefði verið sterk án flugvélarinnar en ljósmyndarinn var þolinmóður og smellti af á hárréttu augnabliki.

Marglaga, vel uppbyggð og afar falleg mynd að mati dómnefndar en um leið þrungin merkingu.“

Fréttamynd ársins 2024Eggert Jóhannesson var verðlaunaður fyrir þessa mynd, sem var valin Fréttamynd ársins 2024.

Mynd: Eggert Jóhannesson

Einnig voru veitt verðlaun fyrir Fréttamynd ársins 2024 og var það Eggert Jóhannesson, ljósmyndari á Morgunblaðinu og mbl.is, sem hlaut þau. „Fréttamynd ársins fangar augnablik sem breytti sögunni, tímapunktinn þegar þjóðin áttaði sig endanlega á alvarleika stöðunnar í Grindavík. Mannslíf hafði tapast, skilningur okkar á aðstæðum breyst, vendipunkti var náð,“ segir í umsögn dómnefndar um mynd Eggerts.

„Myndin fangar nöturleikann vel og gefur góða tilfinningu fyrir umfangi björgunaraðgerða og hversu erfiðar þær voru. Aðstæður á vettvangi voru afar krefjandi fyrir björgunarfólk og vafalaust einnig fyrir ljósmyndara að störfum. Um hættusvæði var að ræða, aðgangur takmarkaður, veður slæmt.

Ljósmyndari staðsetur sig fullkomlega; sýnir okkur atburðinn vel og minnir á að sprungan er ekki staðsett á víðavangi heldur alveg við hús, hús sem stendur að því er virðist á engu. Aðstæður hamla ekki ljósmyndaranum við störf sín heldur nýtir hann þær sér í hag og bleytan á linsunni bætir dýpt í myndina, endurspeglar aðstæður með áþreifanlegum hætti.

Myndefnið er vel rammað inn og þótt segja megi að ró sé yfir, má skynja þungann undir. Yfir vettvangi hanga síðan rauð flögg, sem er einstaklega táknrænt.“

Dómnefndarstörf fóru fram snemma í febrúar en í ár skipuðu óháðu dómnefndina: Árni Torfason, Hrund Þórsdóttir, Una Sighvatsdóttir og Patrick Brown, tvöfaldur World Press Photo vinningshafi sem var formaður dómnefndar.