Guðrún Hafsteinsdóttir hefur verið kjörin nýr formaður Sjálfstæðisflokksins. Hún fékk 50,11 prósent atkvæða á 45. landsfundi flokksins í Laugardalshöll fyrr í dag og tekur við af Bjarna Benediktssyni sem hefur verið formaður frá árinu 2009.
Er þetta í fyrsta sinn í sögu Sjálfstæðisflokksins sem kona er kjörin formaður, en í framboði voru einnig Áslaug Arna Sigurbjörnsdóttir, sem fékk 49,09 prósent atkvæða, og Snorri Ásmundsson myndlistarmaður.
Guðrún 19 fleiri atkvæði en Áslaug Arna. Gild atkvæði voru 1858.
Talsverð spenna ríkti í aðdraganda formannskjörsins en tvísýnt þótti hvort það yrði Áslaug Arna eða Guðrún sem myndi bera sigur úr býtum. Samkvæmt heimildum Vísis þurfti að telja atkvæðin tvisvar, en ljóst er af úrslitunum að varla mátti tæpara standa á milli frambjóðendanna tveggja.
„Ég brenn fyrir þjóð mína og landið mitt. Þetta er ekki sigur einstaklingsins, þetta er sigur okkar allra,“ sagði Guðrún eftir að tilkynnt var um niðurstöðurnar.
Hún sagði að flokkurinn hygðist snúa vörn í sókn og að hún væri tilbúin í þá vegferð. „Við ætlum að stækka flokkinn og verða aftur hryggjarstykkið í íslenskri pólitík.“
Áslaug Arna Sigurbjörnsdóttir hélt ræðu þar sem hún óskaði Guðrúnu til hamingju með sigurinn. „Ég er stolt af því að hafa látið slag standa og gefið kost á mér sem formaður,“ sagði hún. Áslaug sagði að fundurinn væri sigur fyrir Sjálfstæðisflokkinn og sagði að fleiri hefðu tekið þátt í honum en kusu Vinstri græn í Reykjavíkurkjördæunum báðum.
Fréttin hefur verið uppfærð.
Athugasemdir