Einar Þorsteinsson, borgarstjóri og oddviti Framsóknarflokksins, hefur slitið meirihlutasamstarfinu í Reykjavíkurborg. Meirihlutinn er því fallinn. Þetta tilkynnti hann í viðtali við RÚV eftir fund með oddvitum flokkanna sem lauk á áttunda tímanum í kvöld. Meirihlutinn samanstóð af Samfylkingu, Framsókn, Pírötum og Viðreisn.
„Ég hef tekið þá ákvörðun að slíta meirihlutasamstarfinu. Við teljum að við höfum ekki náð þeim árangri fyrir Reykvíkinga sem við lofuðum þeim. Við lofuðum þeim breytingum og í þessu samstarfi tekst okkur ekki að knýja fram breytingar sem við teljum nauðsynlegar,“ sagði Einar í viðtali við RÚV að loknum fundi oddvitanna sem lauk á áttunda tímanum í kvöld.
Spurður nánar út í ástæður sínar sagði hann að meirihlutinn þyrfti að taka stærri ákvarðanir í húsnæðismálum og að tryggja rekstraröryggi flugvallarins. Þá segir Einar að hann hafi viljað ná að knýja fram á leiðir í leikskóla- og daggæslumálum sem virðist ekki hafa verið sátt um. En hann segir að það sem mestu máli hafi skipt hafi verið rekstur borgarinnar. Hann hafi viljað ganga lengra í hagræðingu en oddvitar flokkanna hafa náð saman um. Spurðu hvað hafi verið útslagið, segir Einar að það hafi verið flugvallarmálið, en borgarfulltrúi Samfylkingarinnar, Hjálmar Sveinsson, var gagnrýninn á borgarstjórann eftir að hann hafði verið í viðtali í Dagmálum á mbl.is.
„Það gerði það kannski að verkum að ágreiningurinn varð augljósari heldur en við höfum kannski séð áður,“ sagði Einar. Því næst áréttaði Einar mikilvægi flugvallarins og það þyrfti að tryggja hann í sessi.
Einar hefur þegar átt í óformlegum samskiptum við oddvita nokkurra flokka, og bætir svo við:
„Og ég hef ákveðið að boða til meirihlutaviðræða við oddvita Sjálfstæðisflokks, Flokks Fólksins og Viðreisnar.“
Viðreisn er í meirihluta núna ásamt Samfylkingunni og Pírötum, auk Framsóknar.
Leiðrétt: Í fyrstu útgáfu sagði að Einar hefði verið í viðtali í þættinum Spursmál á mbl.is, en viðtalið birtist í Dagmálum.
Athugasemdir (2)