Ástráður Haraldsson ríkissáttasemjari lagði síðdegis fram innanhússtillögu í kjaradeilu kennara, ríkis og sveitarfélaga.

Tillagan var kynnt samninganefndum á fundi í húsnæði ríkissáttasemjara í Borgartúni í dag.

Samninganefndir hafa til klukkan 13 á laugardag til að taka afstöðu til tillögunnar en þá hefur verið boðað til næsta fundar hjá ríkissáttasemjara.

Frá fundinum í Borgartúni í dag

Mynd: Golli

Innanhússtillögur eru þess eðlis að ekki þarf að fara í allsherjaratkvæðagreiðslu um þær meðal félagsmanna heldur eru það samninganefndir beggja aðila sem þurfa að fallast á þær. 

Ef samninganefndirnar samþykkja tillöguna jafngildir það því að skrifað verði undir kjarasamning og verður þá fyrirhuguðum verkföllum frestað, en boðað hefur verið til verkfalls í skólum á mánudag - í fjórtán leikskólum og sjö grunnskólum. 

Mynd: Golli

Ljóst er að enn er langt á milli deiluaðila og er þetta leið ríkissáttasemjara til að reyna að höggva á þann mikla hnút sem kominn er upp í kjaradeilunni.