Þetta er mjög mikil vinna, eins og ég ímynda mér að hafi verið í síld­inni í gamla daga. Þetta eru bara allar hendur á dekk. Að reyna að sann­færa stjórn­völd um að fara eftir lögum og tryggja öryggi bæði fólks og nátt­úru er meiri háttar verk­efni, því miður,“ segir Katrín Odds­dóttir, land­eig­andi í Seyð­is­firði og lög­maður VÁ - félags um vernd fjarðar, sem stendur fyrir  und­ir­skrifta­söfnun þar sem biðlað er til stjórn­valda að stöðva leyf­is­veit­ingu til sjó­kvía­eldis í Seyð­is­firði. 

Tæplega 13.000 und­ir­skriftir hafa safn­ast og í vik­unni rann út frestur til að skila inn at­huga­semd­um til Mat­væla­stofn­unar (MAST) vegna rekstr­ar­leyf­is fyr­ir sjó­kvía­eldi í Seyð­is­firði. Um 200 athuga­semdir bár­ust en þær hafa ekki verið gerðar opin­berar. Í umsögn Veð­ur­stof­unnar, sem Heim­ildin hefur undir höndum, kemur fram að rétt sé að end­ur­skoða hættu­mat.  

Katrín hefur trú á að for­ystu­fólk nýju rík­is­stjórn­ar­innar muni hlusta, þrátt fyrir að Hanna Katrín Frið­riks­son atvinnu­vega­ráð­herra hafi í tvígang frestað fundi með VÁ. „Til­finn­ingin sem ég fæ er auð­vitað sú að það er verið að hægja á þessu,“ segir Katrín. 

Hitti fyrrverandi aðstoðarforstjóra á barnum 

Fyr­ir­tækið Kaldvík áformar að ala lax í sjó­kvíum á þremur stöðum í Seyð­is­firði. MAST hefur unnið til­lögu að leyf­inu sem er fyrir allt að 10 þús­und tonna lax­eldi í firð­inum. Katrín rakst á Jens Garðar Helgason, fyrr­ver­andi aðstoð­ar­for­stjóra Kald­víkur og nýkjör­inn þing­mann Sjálf­stæð­is­flokks­ins, á ónefndum bar nýlega þar sem þau komust ekki hjá því að ræða sjó­kvía­eldið í Seyð­is­firði. „Mér fannst áhuga­vert að hann vildi full­yrða við mig að það væri ekki hægt að stoppa þetta af því að þetta væri komið of langt.“ 

Katrín ætlar að halda ótrauð áfram að berj­ast gegn því að eldið verði að veru­leika. „Ég virka þannig sem mann­eskja að ég reyni að berj­ast fyrir því sem ég trúi á að sé rétt, með þeim aðferðum sem ég tel að séu lög­legar, góðar og sið­ferði­legar.“ 

MAST hefur fjórar vikur til að taka afstöðu til leyf­is­ins eftir að frestur til að skila inn athuga­semdum rennur út. „En björn­inn er ekki unn­inn þótt ein­hverjar fjórar vikur líði og ekki er komið leyfi,“ segir Katrín.