„Móður og barni heilsast vel,“ segir Bjarki Borgþórsson sem í dag tók á móti syni þeirra Hildar Þórisdóttur, sem kom óvænt snemma í heiminn. Fjölskyldan er búsett á Seyðisfirði og Fjarðarheiðin var ófær vegna snjóþyngsla þegar Hildur fæddi drenginn, en hún var sett 3. febrúar.
„Við bjuggumst ekki alveg við þessu núna“
„Það var um hálf ellefu sem hann kom í heiminn en það fór að bera á honum klukkutíma áður. Við bjuggumst ekki alveg við þessu núna,“ segir Bjarki í samtali við Heimildina. Hann starfar sem snjóeftirlitsmaður fyrir Veðurstofu Íslands og sem lögreglumaður. Hans fyrstu verk þegar Hildur var komin með hríðir voru að hafa samband við lögregluna þannig að hægt væri að moka út sjúkrabílinn á svæðinu, sem og láta sjúkrahúsið á Egilsstöðum vita. Þá var einnig haft samband við Landhelgisgæsluna ef flytja þyrfti fæðandi móðurina á Fjórðungssjúkrahúsið sem er í Neskaupstað, en þar er fæðingardeild fjórðungsins staðsett.
Tveir sjúkraflutningamenn á Seyðisfirði brugðust skjótt við og tóku á móti drengnum ásamt Bjarka.
Síðan var kölluð til ljósmóðir sem er búsett á Seyðisfirði en er hætt störfum og var hún komin á heilsugæsluna í firðinum ásamt lækni, en þegar ljóst var að ekki tækist að koma Hildi þangað í tæka tíð mættu ljósmóðirin og læknirinn því heim til fjölskyldunnar.
Ljósmóðirin heitir Lukka Gissurardóttir og hefur ekki tekið á móti barni á Seyðisfirði síðan 1988 en svo skemmtilega vill til að hún tók einmitt á móti Bjarka, föðurnum, þegar hann fæddist árið 1982.
„Þetta gekk allt vel, fór allt á besta veg miðað við aðstæður en það var óþægilegt að vita af því að allt væri ófært og það hefði ekki margt mátt fara úrskeiðis,“ segir Bjarki.
Eftir að hefðbundin fæðingaþjónusta var lögð af á Seyðisfirði færðist hún tímabundið til Egilsstaða en hefur síðan verið á Neskaupstað.
Nú eru 32 ár síðan barn fæddist síðast í firðinum og það vildi þannig til að Bjarki hitti viðkomandi, Daða Sigfússon, úti í matvörubúð fyrr í dag og hafði Daði þá þegar heyrt fregnirnar um að hann væri ekki lengur síðasti Seyðfirðingurinn til að fæðast þar. „Þetta var greinilega búið að fréttast,“ segir Bjarki kíminn.
Hildur ber sig vel og skrifaði síðdegis á Facebook-síðu sína: „Þrátt fyrir þá lífsins lukku að okkur heilsist vel eftir lætin með ómetanlegri hjálp frá okkar góða heilbrigðisstarfsfólki þá byði ég ekki í það ef allt hefði farið úrskeiðis. Hér er jú ekki fæðingardeild og úrræðin takmörkuð þegar hlutirnir gerast svo hratt að ekki er einu sinni unnt að komast að heiman.“
„Sýnið þann dug að standa við gefin fyrirheit“
Hún ákallar forsvarskonur ríkisstjórnarinnar, þær Kristrúnu Frostadóttur, Þorgerði Gunnarsdóttur og Ingu Sæland, og skrifar: „Þetta er enn ein áminningin um öryggisleysið sem við búum við og hversu brýnt það er að Fjarðarheiðargöng fari í útboð, sem nú hafa beðið fullhönnuð og tilbúin í rúm 2 ár eftir 4 ár af framkvæmdaleysi í jarðgöngum! Sýnið þann dug að standa við gefin fyrirheit og hleypa göngunum af stað sem hafa beðið allt of lengi!
Við getum ekki sætt okkur við ótryggar samgöngur á landsbyggðinni og það árið 2025. Sem ógnar of stóran hluta úr ári heilsu og lífi fólks. Slíku metnaðarleysi og byggðastefnu getum við ekki unað við lengur!“
Athugasemdir (2)