Nýsamþykkt vopnahlé milli Ísraels og Hamas markar tímamót í því að binda enda á 15 mánaða átök á Gaza-svæðinu. Samkomulagið, sem á að taka gildi sunnudaginn 19. janúar, miðar að því að stöðva átökin og koma á ferli sem stuðlar að friði og uppbyggingu á svæðinu.

Ísraelsstjórn þarf að samþykkja samning um vopnahlé til þess að hann taki gildi. Atkvæðagreiðsla um hann fer fram á morgun en búist er við því að samningurinn verði samþykktur. 

Vopnahléið varð að veruleika í kjölfar umfangsmikilla samningaviðræðna með milligöngu Katar, Egyptalands og Bandaríkjanna. Mikilvægur árangur náðist eftir 96 tíma viðræður í Doha, þar sem málsaðilar sammæltust um skilmálana

Vopnahléið er skipulagt í þremur fösum. Fyrsti fasi, sem gert er ráð fyrir að standi yfir í 42 daga, felur í sér að átökin verða stöðvuð tímabundið. Samkvæmt samkomulaginu mun Hamas sleppa 33 gíslum, þar á meðal konum, börnum og körlum eldri en 50 ára. Í staðinn mun Ísrael sleppa palestínskum föngum; þrjátíu þeirra fyir hvern ísraelskan gísl.  Þá mun Ísrael heimila mannúðaraðstoð inn á Gaza, auðvelda heimkomu flóttafólks og hefja skipulega brotthvarf herliðs frá svæðinu.

Annar fasi vopnahlésins felur í sér viðræður um varanlegt vopnahlé. Sömuleiðis að Hamas muni sleppa þeim karlkyns gíslum sem eftir eru, bæði óbreyttum borgurum og hermönnum, í skiptum fyrir fleiri palestínska fanga.

Í þriðja fasanum verður hafist verður handa við að endurbyggja innviði Gaza og styðja við efnahagslega uppbyggingu. Í honum felst sömuleiðis að líkamsleifar látinna ísraelskra gísla verði afhentar.

Þrátt fyrir jákvæðar væntingar alþjóðasamfélagsins er velgengni vopnahlésins háð því að allir aðilar standi við skilmálana og taki þátt í viðræðum sem miði að varanlegum friði á svæðinu.

Þorgerður Katrín Gunnarsdóttir, utanríkisráðherra, fagnaði því á Facebook að vopnahléið væri í höfn. Hún benti þó á að þetta væri aðeins fyrsta skrefið á langri leið framundan í átt að friði og stöðugleika á svæðinu.