Guðmundur Ari Sigurjónsson var kjörinn þingflokksformaður Samfylkingarinnar á þingflokksfundi í dag. Guðmundur Ari skipaði 2. sæti á lista Samfylkingarinnar í Suðvesturkjördæmi í kosningunum í nóvember. Áður var hann oddviti Samfylkingarinnar á Seltjarnarnesi. Hann tekur við stöðu þingflokksformanns af Loga Einarssyni sem nú hefur tekið til starfa sem menningar-, nýsköpunar- og háskólaráðherra.
Arna Lára Jónsdóttir var kjörin varaformaður stjórnar þingflokks og Kristján Þórður Snæbjarnarson ritari. Öll koma þau ný inn á þing en Arna Lára hefur tekið sæti sem varaþingmaður, fyrst árið 2010 en síðast í febrúar 2020.
Kosningin var samhljóða og samkvæmt tillögu formanns flokksins.
„Það er mikil ábyrgð og heiður sem fylgir því vera formaður í þingflokki jafnaðarmanna. Samfylkingin hefur átt öflugan þingflokk og eftir kosningar fjölgaði verulega í hópnum. Ég hlakka til að vinna með þessu fjölhæfa fólki í góðu samstarfi við ríkisstjórn Kristrúnar Frostadóttur og aðra flokka á Alþingi. Við höfum verk að vinna,“ er haft eftir Guðmundi Ari um kjörið í tilkynningu frá Samfylkingunni.
Guðmundur Ari hefur verið formaður framkvæmdastjórnar í Samfylkingunni frá landsfundi haustið 2022 en lætur nú af þeirri stöðu. Hann hefur setið í sveitarstjórn á Seltjarnarnesi frá árinu 2014.
Þing kemur saman 20. janúar.
Athugasemdir