Ný ríkisstjórn Viðreisnar, Samfylkingar og Flokks fólksins hefur sett sér háleit markmið. Stjórnin ætlar sér að byrja á því að ná stöðugleika í efnahagslífi og lækkun vaxta. Aukin verðmætasköpun í atvinnulífi er einnig sett á oddinn sem og bætt lífskjör landsmanna, eins og það er orðað í sáttmálanum.
Ráðherraembætti verða eftirfarandi:
- Kristrún Frostadóttir, forsætisráðherra.
- Þorgerður Katrín Gunnarsdóttir, utanríkisráðherra.
- Inga Sæland, félags- og húsnæðismálaráðherra.
- Hanna Katrín Friðriksson, atvinnuvegaráðherra.
- Logi Einarsson, menningar-, nýsköpunar- og háskólaráðherra.
- Þorbjörg Sigríður Gunnlaugsdóttir, dómsmálaráðherra.
- Ásthildur Lóa Þórsdóttir, mennta- og barnamálaráðherra.
- Eyjólfur Ármannsson, samgöngu- og sveitarstjórnarráðherra.
- Jóhann Páll Jóhannsson, umhverfis-, orku- og loftslagsráðherra.
- Alma D. Möller, heilbrigðisráðherra.
- Daði Már Kristófersson, fjármála- og efnahagsráðherra.
Hér eru markmið nýrrar ríkisstjórnar í grófum dráttum:
1. Stöðugleiki í efnahagslífi með lækkun vaxta
2. Aukin verðmætasköpun í atvinnulífi
3. Bætt lífskjör fólksins í landinu. Húsnæðisöryggi í forgangi
4. Uppræta fátækt og hækka greiðslur til tekjulægri lífeyrisþega
5. Einföldun stjórnsýslu og hagræðing í ríkisrekstri
6. Fjárfesting í innviðum, meðal annars til þess að efla heilbrigðis- og velferðarþjónustu og auka verðmætasköpun
7. Huga að íslenskri tungu, menningu og náttúru
8. Hafa mannréttindi og virðingu fyrir fjölbreytileika sem leiðarljós
Aðgerðirnar
23 aðgerðir eru kynntar til sögunnar til þess að ná þessum markmiðum. Þær eru misskýrar. Hér förum við yfir nokkrar þeirra.
1. Hagræða og einfalda stjórnsýslu og sameina stofnanir. Ný ríkisstjórn hefur þó ekki kynnt hvaða stofnanir verða sameinaðara eða með hvaða hætti nákvæmlega hagrætt verður í rekstri.
2. Móta auðlindastefu um „sjálfbæra nýtingu og réttlát auðlindagjöld sem renni að hluta til nærsamfélags“. Samþykkja ákvæði í stjórnarskrá um auðlindir í þjóðareign.
3. Auka fjárfestingu í samgöngum og hefja kraftmiklar framkvæmdir um allt land, vinna í jarðgangagerð, ráðast í útbætur í samræmi við samgöngusáttmála höfuðborgarsvæðisins. Þá ætlar stjórnin sér að hefjast handa við framkvæmd Sundabrautar og innheimta fyrir það veggjöld.
4. Ráðast í bráðaaðgerðir til að fjölga íbúðum hratt. Breyta lögum um skammtímaleigu, liðka fyrir uppbyggingu færanlegra einingahúsa og umbreytingu atvinnuhúsnæðis í íbúðir. Hlutdeildarlán verða jafnframt fest í sessi.
5. Herða eftirlit með starfsmannaleigum, efla heimildir til vinnustaðaeftirlits og fleira til þess að draga úr félagslegum undirboðum á vinnumarkaði.
6. Auka orkuöflun, styrkja flutningskerfi og bæta orkunýtni, meðal annars með því að einfalda ferli leyfisveitinga. Verkefni í nýtingarflokki verða látin njóta forgangs. Breyta raforkulögum til að tryggja forgang heimila og almennra notenda.
7. Ráðast í markvissar loftslagsaðgerðir til þess að ná kolefnishlutleysi fyrir árið 2040. Ráðist í aðgerðir til að vernda hafsvæði og ósnortin víðerni.
8. Hækka örorku- og ellilífeyri á hverju ári til samræmis við hækkun launavísitölu en þó aldrei minna en verðlag. Almennt frítekjumark ellilífeyris hækkar í skrefum upp í 60 þúsund krónur á mánuði, tekið verður upp frítekjumark ellilífeyris vegna vaxtatekna og dregið úr skerðingum lífeyris vegna atvinnutekna.
9. Lögfesta samning Sameinuðu þjóðanna um réttindi fatlaðs fólks og fjármagna þann fjölda samninga um notendastýrða persónulega aðstoð (NPA) sem gefin hafa verið fyrirheit um.
10. Taka upp auðlindagjald fyrir aðgang ferðamanna að náttúuperlum.
11. Gera kröfur um gagnsæi í eignarhaldi í sjávarútvegi. Tryggðir 48 dagar til strandveiða. Styrkja lagaumgjörð fiskeldis og breyta jarðarlögum til að vinna gegn samþjöppun.
12. Styðja „myndarlega“ við listir og menningu.
13. Fjölga hjúkrunarrýmum, efla heimaþjónustu, vinna að því að allir landsmenn fái fastan heimilislækni.
14. Sókn í menntamálum.
15. Uppræta fordóma, meðal annars með jafnréttis- og hinseginfræðslu.
16. Heimila afturköllun alþjóðlegrar verndar og brottvísun fólks sem fremur alvarleg afbrot.
17. Breytingar á fæðingarorlofskerfi, hækka fæðingarstyri námsmanna og fólks utan vinnumarkaðar, tryggja óskertar tekjur tekjulægri foreldra.
18. Fjölga lögreglumönnum verulega. Styrkja réttarkerfið til að tryggja hraða málsmeðferð.
19. Bæta samskipti ríkis og sveitarfélaga.
20. Vinna áfram með Grindavíkurbæ um lausn á málefnum sveitarfélagsins, íbúa o.fl.
21. Breyta kosningalögum til þess að auka jafnræði í atkvæðavægi og þingsætadreifingu.
22. Þjóðaratkvæðagreiðsla um viðræður um aðild að ESB eigi síðar en 2027.
Athugasemdir (1)