Rétt rúmur helmingur grunnskólabarna í Reykjavík fer fótgangandi í skólann samkvæmt niðurstöðum könnunar á ferðavenjum sem Gallup vann fyrir borgina í október. Fjórðungi barnanna var ekið í skólann á einkabíl og 11 prósent fóru á hjóli. Níu prósent grunnskólabarna fóru með strætó í skólann. 

Niðurstaðan er svipuð og í sambærilegri könnun fyrir ári, þá gengu 56 prósent barnanna í skólann en 53 prósent nú, en töluverð breyting hefur orðið frá árinu 2022. Samkvæmt svörum foreldra barnanna við könnuninni gengu 66 prósent þeirra í skólann þá. 

Sveiflur eru töluverðar milli ára og þótt fjórðungur (24%) hafi farið á einkabíl í skólann nú í október er það litlu meira en að meðaltali síðasta áratuginn eða svo. Árið 2015 skar sig nokkuð úr en þá var 27 prósentum barna ekið í skólann. Síðan þá hefur hlutfallið verið á bilinu 16 til 24 prósent.

Athygli vekur í könnun Gallup að eftir því sem foreldrar eru eldri þeim mun ólíklegra er að þeir aki börnum sínum í skólann. 32 prósent foreldra á aldrinum 18 til 32 ára sögðu börnum sínum hafa verið ekið í skólann er könnunin var gerð en aðeins 16 prósent foreldra sem eru 45 ára og eldri. Verið getur að aldur barnanna skipti hér máli, eftir því sem börn eru eldri, þeim mun líklegra er að þau bjargi sér í skólann sjálf.