Meirihluti umhverfis- og skipulagsráðs Reykjavíkur samþykkti á fundi sínum í vikunni að fækka áramótabrennum í borgarlandinu. Fulltrúar Sjálfstæðisflokks lögðust gegn því.
Undanfarin ár hefur áramótabrennum farið fjölgandi í borgarlandinu og voru þær 10 um síðustu áramót. Samkvæmt samþykkt ráðsins verður þeim fækkað um fjórar og ákveðnum brennum verður að auki fundinn nýr staður.
Þær fjórar brennur sem samþykkt hefur verði að leggja niður eru:
- Rauðavatn. Það hafa skapast umferðarvandræði undanfarin ár við Suðurlandsveginn og vegna mögulegra umhverfisáhrifa á Rauðavatn.
- Suðurfell (Jafnasel árið 2023). Eldri staðsetning brennunnar er ekki lengur í boði vegna nýs Arnarnesvegar. Þessari brennu verður fundinn nýr staður í Breiðholti.
- Laugardalur. Nálægð við byggð og aðgengi er slæmt.
- Skerjafjörður. Aðgengi er slæmt og nálægð við byggð of mikil.
Á sama tíma og brennum hefur fjölgað hefur verið mikil umræða um fjöldamörg atriði er varðar brennur „enda hafa þær bæði mikil skammtím-a og langtímaumhverfisáhrif ásamt því að vera dýrar í uppsetningu og rekstri,“ segir í rökstuðningi Hjalta J. Guðmundssonar, skrifstofustjóra borgarlandsins. Þá hefur Slökkvilið höfuðborgarsvæðisins gert athugasemdir við ákveðnar brennur vegna nálægðar við byggð.
Hins vegar er sterk hefð fyrir brennum í Reykjavík hjá mörgum íbúum og því vilja borgaryfirvöld reyna að mæta báðum sjónarmiðum. Þær brennur sem áfram verða haldnar í borgarlandinu verða á eftirtöldum stöðum:
- Vesturbær (með fyrirvara um góða staðsetningu)
- Gufunes
- Geirsnef
- Jafnasel (ný staðsetning)
- Úlfarsárdalur
- Kjalarnes
Allar brennur verða minni en 250 rúmmetrar og því skilgreindar sem litlar brennur. „Með þessu móti verður komið til móts við bæði sjónarmið þeirra sem vilja hafa brennur með því að tryggja að hver borgarhluti hafi brennu og svo hinna sem vilja fækka þeim verulega og með því draga úr umhverfisáhrifum og kostnaði“, segir í rökstuðningi skrifstofustjóra borgarlandsins.
Mikill kostnaður
„Þær hafa gegnt mikilvægu menningarhlutverki, eru fjölskylduvænir viðburðir sem stuðla að samheldni íbúa og jákvæðum hverfisanda“
Fulltrúar Samfylkingar, Framsóknar, Pírata og Viðreisnar, sem samþykktu tillögu um fækkun brenna, benda í bókun á að kostnaður við brennur sé orðinn töluverður. Til dæmis sé kostnaður við förgun um 20 milljónir króna og við hann bætist kostnaður vegna efniviðs og mönnunar við að sinna uppsetningu og utanumhaldi. „Í erfiðu fjárhagslegu umhverfi er eðlilegt að horfa í hverja krónu, sér í lagi þegar athugasemdir frá viðbragðsaðilum liggja fyrir“, segir í bókun meirihlutans. Þar er enn fremur bent á að vegna staðla þurfi nú að kaupa efni í brennur frekar en að nýta eitthvað sem falli til við framkvæmdir. „Hér er verið að fara ákveðna millileið, að mæta gagnrýnum sjónarmiðum og þeirri sterku hefð sem er fyrir brennum um áramót.“
Menningarhlutverk
Fulltrúar Sjálfstæðisflokksins segja í sinni bókun að þær brennur sem eigi að afleggja eigi sér áratuga hefð. „Þær hafa gegnt mikilvægu menningarhlutverki, eru fjölskylduvænir viðburðir sem stuðla að samheldni íbúa og jákvæðum hverfisanda.“
Sjálfstæðismenn segja ákvörðun borgaryfirvalda um að afleggja þessar fjórar brennur vera fráleita og að hún sé gerð án nokkurs samráðs við íbúa eða íbúasamtök. Ákvörðunin sé „aðför að grónum hefðum í skemmtanahaldi borgarinnar um jól og áramót“.
Athugasemdir