Sveitarstjórn Skeiða- og Gnúpverjahrepps hefur samþykkt umsókn Landsvirkjunar um framkvæmdaleyfi Hvammsvirkjunar í Þjórsá. Landsvirkjun hyggst reisa Hvammsvirkjun í neðri hluta Þjórsár, á landi sem tilheyrir annars vegar Skeiða- og Gnúpverjahreppi og hins vegar Rangárþingi ytra, og felur framkvæmdin í sér fjögurra ferkílómetra lón í byggð.  

Þetta er í annað sinn sem framkvæmdaleyfi virkjunarinnar er samþykkt. Orkustofnun gaf út virkjunarleyfi fyrir Hvammsvirkjun í desember 2022 og sveitarfélögin samþykktu framkvæmdaleyfi sumarið 2023. Úrskurðarnefnd umhverfis- og auðlindamála bárust tíu kærur vegna virkjunarleyfisins og var niðurstaða nefndarinnar að fella leyfið úr gildi og þar með framkvæmdaleyfið. Virkjunarleyfi var endurnýjað í haust og nú hefur framkvæmdaleyfi verið samþykkt í báðum sveitarfélögum. 

Framkvæmdaleyfið var samþykkt samhljóða á fundi sveitarstjórnar Rangársþings ytra í síðustu viku en leyfið var samþykkt með fjórum atkvæðum gegn einu í Skeiða- og Gnúpverjahreppi. Axel Á. Njarðvík, fulltrúi U-listans, greiddi atkvæði gegn leyfinu. „Fyrirhuguð Hvammsvirkjun mun hafa veruleg og óafturkræf áhrif á náttúru, lífríki og landslag. Öllum ætti að vera löngu ljóst að tjónið og skaðinn sem Hvammsvirkjun mun valda á náttúru og samfélagi verður aldrei bætt,“ segir í bókun sem Axel lagði fram á fundinum. Axel og eiginkona hans, Sigþrúður Jónsdóttir, hafa barist ötullega fyrir verndun Þjórsárvera. Axel segir tilgang framkvæmdanna enn óljósan auk þess sem óljóst er hvort orkuskipti sé yfir höfuð raunverulegur tilgangur virkjunarinnar. 

„Það er ekkert sem stoppar Landsvirkjun í því að hefja framkvæmdir af fullum krafti,“ segir Haraldur Þór Jónsson, oddviti Skeiða- og Gnúpverjahrepps, í samtali við Heimildina. Hann segist samt sem áður fullmeðvitaður um að andstæðingar virkjunarinnar muni kæra leyfisveitingar til úrskurðarnefndar umhverfis- og auðlindamála, rétt eins og gert var síðast þegar framkvæmdaleyfið var veitt. „Umræðan í þessum málaflokki er pólitísk deila,“ segir Haraldur.