Á sáttafundum sem haldnir voru hjá Pírötum til þess að útkljá deilur sem komu upp eftir kosningar um framkvæmdastjórn flokksins var ekki aðeins lögð fram tillaga um að stækka stjórnina tímabundið heldur var líka lagt að breyta ýmsum öðrum reglum um framkvæmdastjórn Pírata.

Eins og áður hefur komið fram hefur Heimildin undir höndunum drög samstarfssáttmála sem settur var saman á sérstökum sáttafundi milli nýkjörinnar framkvæmdastjórnar og fráfarandi aðalmanna í stjórninni sem borgarráðsfulltrúinn Dóra Björt Guðjónsdóttir stýrði. 

Á fundinum er meðal annars lagt til að allar ákvarðanir framkvæmdastjórnar þurfi að samþykkja með auknum meirihluta atkvæða. Í vinnuskjalinu hljóðar tillagan svona:

„Ákvarðanir stjórnar þurfi að samþykkja eða synja með auknum meirihluta atkvæða, miðað við meira en 65% hlutfall. minnst 5 atkvæðum.“

Gengið út frá því stjórnin verði stækkuð

Þessi tillaga virðist hafa verið nokkuð umdeild meðal fundarmanna sem sóttu sáttafundinn 17. september síðastliðinn. Í vinnuskjalinu má sjá að Þórildur Elínardóttur Magnúsdóttur, sem var kjörin aðalmaður í framkvæmdastjórn Pírata á síðasta aðalfundi, gerir athugasemd við tillöguna.

Þá skrifar hún í skjalið þar hún hnýtir í að tillagan virðist ganga út frá því að sjö manna framkvæmdastjórn muni taka til starfa. Hins vegar á enn eftir að leggja fram og kjósa um tillögurnar fram á félagsfundi.

„Hérna er búið að gera ráð fyrir að stjórnin sé stækkuð í 7… og væri þetta eðlilegur atkvæðafjöldi miðað við það en gríðarlega heftandi í 5 meðlima stjórn. Legg til að þessu verði breytt í “auknum meirihluta atkvæða.”

Hvorki náðist í Dóru Björt Guðjónsdóttur né Halldór Auðar Svansson, formann framkvæmdastjórnar Pírata. Heimildin náði tali af Atla Stefáni Yngvasyni, fyrrum formanni framkvæmdastjórnar Pírata, sem vildi ekki tjá sig um tillöguna um að breyta reglum um ákvörðunartöku framkvæmdastjórnar. 

Fréttaflutningur endurspegli ekki stemminguna í Pírötum 

Dóra Björt tjáði sig nýverið um fréttir sem skrifaðar hafa verið um ágreininginn innan raða Pírata eftir vegna kosningar í framkvæmdastjórn flokksins. Í færslu sem Dóra Björt birti á Facebook síðu sinni segir hún að aðkoma hennar að sáttarfundunum hafi verið til þess að stuðla uppbyggilegum samtali á milli samtali á milli deilu aðila. Hún segist ekki hafa tekið afstöðu með fyrrverandi stjórn. 

„Ég ákvað að fallast á að taka þetta að mér þegar ég var beðin um það því mér þykir vænt um það fallega afl sem Píratar eru og ég vildi vernda okkar mikilvæga erindi í samfélaginu svo það myndi ekki líða vegna þessa deilumáls. Sömuleiðis hafði ég áhyggjur af því að vegna málsins myndi nýja fólkið í stjórninni ekki upplifa sig velkomið og þess vegna fannst mér mikilvægt að koma á uppbyggilegum tóni í umræðuna.“

Dóra Björt bætir við að hún telji það vera ofsögum sagt að hreyfingin sé klofin í ólíkar fylkingar sem berjist um völd innan flokksins. 

„Þessi fréttaflutningur endurspeglar ekki stöðu Pírata eða stemninguna. Við stöndum saman og erum sterk saman. Eftir þennan aðalfund erum við vel mönnuð og tilbúin í bátana og ætlum að fara í ríkisstjórn. Þá fyrst byrjar Píratabyltingin fyrir alvöru.“