Framboð Katrínar Jakobsdóttur, fyrrverandi forsætisráðherra, til forseta var meira en helmingi dýrara en Höllu Tómasdóttur, forseta Íslands.
Athygli vekur að Katrín eyddi hærri fjárhæð í auglýsinga- og kynningarkostnað einn og sér en Halla í allt framboð sitt. Katrín keypti auglýsingar fyrir 26,5 milljónir. Framboð Höllu eyddi í heild sinni rétt um 26 milljónum og þar af fóru 18,9 milljónir í auglýsingar.
Þetta má sjá á ársreikningum forsetaframboðanna sem birt hafa verið á vef Ríkisendurskoðunar.
Halla sótti hærri fjárhæð en Katrín til lögaðila. Hún tók við 12,1 milljón króna í framlög frá lögaðilum í kosningabaráttu sinni. Katrín Jakobsdóttir fékk 8,6 milljónir frá lögaðilum.
Gríðarlegar tekjur framboðs Katrínar, sem kostaði 57,3 milljónir, skýrast af miklum framlögum einstaklinga. Samkvæmt reikningsskilum framboðsins fengust tæpar 41,6 milljónir í framlög frá einstaklingum.
Frambjóðendurnir tveir létu svipaða upphæð renna til eigins framboðs. Halla lagði til 3,54 milljónir og Katrín 3 milljónir.
Katrín skrifaði á Facebook-síðu sína að einstaklingarnir sem styrktu framboðið hafi verið um 1100. Algengasta framlagið hafi verið 10.000 krónur.
Samkvæmt rekstrarreikningi framboðs Höllu var hverri einustu krónu eytt í framboðið. Katrín stóð hins vegar uppi með tæpar 280 þúsund krónur. Hún skrifar á Facebook að sú fjárhæð verði látin renna til góðgerðarmála á næstunni.
Í aðdraganda forsetakosninganna spurði Heimildin frambjóðendurna hvað þeir áætluðu að framboð þeirra myndu kosta. Katrín giskaði á að hún myndi eyða um 40 milljónum í kosningabaráttuna.
Halla Tómasdóttir, Baldur Þórhallsson og Halla Hrund Logadóttir giskuðu öll á að kosningabaráttur þeirra kostuðu um 20 milljónir króna.
Hún hlýtur að vita eins og við öll hin, að bæði velferð oh innviðir hafa borið svakalega stóran skaða í hennar valdatíð.
Svo kann hún og stuðningsmenn hennar ekki einu sinni að skammast sín.