Bakterían Legionella sem veldur hermannaveiki hefur fundist í tveimur fjölbýlishúsum Leigufélags aldraðra í Vatnsholti. Allir íbúar eru 60 ára eða eldri en veikin leggst illa í fólk með háan aldur.
Heimildin greindi nýverið frá því að ein manneskja hefði greinst með hermannaveiki í Vatnsholti 1 sem stendur við svokallaðan Sjómannaskólareit. Heilbrigðiseftirlit Reykjavíkur fór í hreinsunaraðgerðir á vatnskerfi hússins í kjölfarið.
Aðgerðirnar báru hins vegar ekki nægilega góðan árangur, að því segir í bréfi sem sóttvarnarlæknir sendi íbúum húsanna á föstudag. Bakterían er enn til staðar í lögnum hússins við Vatnsholt 1 og er einnig komin upp í Vatnsholti 3.
Íbúar húsanna hafa verið beðnir um að fara ekki í sturtu í íbúðunum þar til hreinsunaraðgerðum er lokið þar sem smithættan er fyrst og fremst tengd vatnsúða sem myndast þegar sturtur eru notaðar. Íbúar þurfa einnig að sjóða allt vatn sem sett er í rakatæki og rakahylki kæfisvefnsöndunarvéla og skipta um vatn daglega. Smit eiga sér hins vegar ekki stað á milli manna og áfram má nota vatnið til drykkjar.
„Fyrir 2 vikum var ráðist í umfangsmiklar hreinsunaraðgerðir á vatnskerfi í Vatnsholti 1 en þær báru ekki nægilega góðan árangur og þarf því að endurtaka þær,“ segir í bréfinu. „Tekin voru sýni úr vatnskerfi í Vatnsholti 3 og kom í ljós að Legionellu er einnig að finna í vatnskerfinu þar og því þarf að ráðast í hreinsunaraðgerðir þar. Heilbrigiseftirlit Reykjavíkur stýrir aðgerðum.“
51 íbúð er í þessum tveimur þriggja hæða fjölbýlishúsum við hlið Sjómannaskólans sem voru kláraðar árið 2023. Fyrsta skóflustungan að þeim var tekin árið 2021. Leigufélagið var stofnað af Félagi eldri borgara í Reykjavík og nágrennis með það að markmiði að tryggja sem flestum sem náð hafa 60 ára aldri hentugt húsnæði til leigu.
Hár aldur meðal áhættuþátta
Hermannaveiki orsakast af bakteríunni legionella pneumophila og eru náttúruleg heimkynni hennar í vatni. Smit geta orðið þegar svifúði myndast frá vatnsleiðslum eða vatnstönkum og berst í öndunarveg fólks. Alvarleg veikindi verða helst hjá fólki með undirliggjandi áhættuþætti. Eru þeir til dæmis hár aldur, reykingar, langvinnir lungnasjúkdómar, ónæmisskerðing, áfengissýki og nýrnabilun.
Helstu einkenni hermannaveiki eru hiti, hrollur, hósti, beinverkir, höfuðverkur, lystarleysi og stundum niðurgangur, að því fram kemur á Vísindavefnum. „Lungnabólga er alltaf hluti af sjúkdómsmyndinni. Gangur sjúkdómsins er misslæmur og dauðsföll verða í 5–30% tilfella. Meðgöngutími hermannaveiki er 2–10 dagar.“
Leiðrétting: Í greininni stóð áður að fleiri íbúar en einn hefðu veikst af hermannaveiki. Það hafði ekki fengist staðfest við birtingu greinarinnar.
Athugasemdir (2)