Arion banki greiðir sekt vegna ónógra peningaþvættisvarna

A

rion banki mun greiða sekt upp á 585 millj­ónir króna vegna ann­marka í fram­kvæmd á áhættu­mati bank­ans vegna pen­inga­þvættis og fjár­mögn­unar hryðju­verka. Sátt hefur náðst við fjár­mála­eft­ir­lit Seðla­banka Íslands um greiðsl­una.

Íslands­banki gerði í júní sátt vegna sam­bæri­legra ann­marka og greiddi 570 millj­ónir króna. Bankinn hafði áður verið sektaður fyrir að hafa á svig við innri reglur bank­ans og heil­brigða við­skipta­hætti við sölu á hlut í bank­anum sjálfum. Greiddi hann 1,2 millj­arða í þá sekt.

Fyr­ir­tækið SaltPay, sem stundar greiðslu­miðlun, fékk í árs­lok 2022 44 millj­óna króna sekt, eftir harðar ákúrur frá Fjár­mála­eft­ir­liti Seðla­bank­ans um „víð­tæka veik­leika“.

Fjár­mála­eft­ir­litið gerði könnun sum­arið 2022 á aðgerðum Arion banka gegn pen­inga­þvætti og fjár­mögnun hryðju­verka og skrán­ingu og rekj­an­leika í upp­lýs­inga­kerfum bank­ans í tengslum við þær aðgerðir. Komu fram ann­markar þegar kom að almennu áhættu­mati vegna pen­inga­þvættis og fjár­mögnun hryðju­verka og áhættu­mati samn­ings­sam­banda og ein­stakra við­skipta. Einnig á fram­kvæmd áreið­an­leikakann­anna, reglu­bund­ins eft­ir­lits og til­kynn­inga.

Arion lofar bótum

„Með sátt­inni við­ur­kennir bank­inn ann­marka á fram­an­greindri fram­kvæmd og þykir okkur miður að ekki hafi verið rétt staðið að málum á þessum tíma,“ segir í til­kynn­ingu frá Arion banka.

Segist bank­inn hafa unnið mark­visst að því að efla fyr­ir­komu­lag varna gegn pen­inga­þvætta. „Athuga­semdum fjár­mála­eft­ir­lits­ins var strax tekið alvar­lega og ráð­ist í alls­herjar end­ur­skoðun á fram­kvæmd þess­ara mála og er úrbóta­vinna langt á veg komin,“ segir í til­kynn­ing­unni.

Brotin mörg og alvarleg

Í til­kynn­ingu frá fjár­mála­eft­ir­lit­inu segir hins vegar að brotin hafi verið mrög og varðað marga grund­vall­ar­þætti. „Brot máls­að­ila varða áhættu­mat bank­ans á starf­semi vegna pen­inga­þvættis og fjár­mögn­unar hryðju­verka, áhættu­mat á samn­ings­sam­böndum og ein­stökum við­skiptum, nafn­laus við­skipti, fram­kvæmd áreið­an­leikakann­ana á erlendum fjár­mála­fyr­ir­tækjum, fram­kvæmd auk­inna áreið­an­leikakann­ana, aðgerðir máls­að­ila í tengslum við við­skipti við áhættu­samt ríki og reglu­bundið eft­ir­lit með við­skiptum og við­skipta­mönnum, þ.m.t. skrán­ingu og rekj­an­leika reiðu­fjár­við­skipta,“ segir í til­kynn­ing­unni frá fjár­mála­eft­ir­lit­inu.

„Þá telj­ast brotin alvar­leg og nokkur brot eru ítrekuð frá fyrri athugun fjár­mála­eft­ir­lits­ins á fylgni bank­ans við lögin sem fór fram árið 2020,“ segir enn­fremur. „Loks varða mörg brot við­skipta­menn og vörur sem telj­ast til mik­illar áhættu með til­liti til pen­inga­þvættis, s.s. reiðu­fjár­við­skipti.“