Baldur Þórhallsson forsetaframbjóðandi segir að á þeim tíma sem hann var við það að bjóða sig fram til forseta hafi hann orðið fyrir þrýstingi að draga sig í hlé vegna mögulegs framboðs Katrínar Jakobsdóttur, sem þá var enn forsætisráðherra.

Þetta sagði Baldur, sem ásamt fimm öðrum forsetaframbjóðendum, tók þátt í kappræðum Heimildarinnar fyrr í kvöld.

„Nokkrum dögum áður en ég tilkynnti framboð [...] þá voru nokkuð skýr skilaboð úr herbúðum fyrrverandi forsætisráðherra hvort ég ætlaði virkilega að fara fram. Hvort ég vildi ekki láta þar við sitja því hún væri jafnvel að fara að bjóða sig fram.

Og ef ég ætlaði virklega að vera svo vitlaus að bjóða mig fram núna – þarna fyrir páskana – þá hlyti ég að hafa vit á því að draga framboðið til baka því hún kæmi fram eftir páska,“ segir Baldur.

Hann segir að hann hafi þá átt að hafa vit á því að draga framboð sitt til baka. „Því hún kæmi fram eftir páska. Þannig var talað við okkur.“ Baldur segist þó ekkert hafa velt fyrir sér hverjir mótframbjóðendurnir væru. „Ég vil einfaldlega halda fram mínum málum, koma fram á mínum forsendum.“

Ekki með vitund eða vilja Katrínar

Katrín Jakobsdóttir var þá beðin um viðbrögð. Hún vildi gjarnan fá að vita hvaða samstarfsfólk hennar hafi átt að hafa haldið þessum boðskap að Baldri. „Ég er að heyra þetta í fyrsta sinn hér,“ sagði hún. 

Baldur vildi hins vegar ekki svara hverjir hefðu rætt við hann úr herbúðum Katrínar.

Katrín tók þá fram að ekkert slíkt hefði verið gert með hennar vitund eða vilja. „Ég ítreka það sem ég hef sagt. Þetta eru bara kosningar, við búum í frjálsu landi, það má hver gefa kost á sér sem vill og ég hef ekki reynt að beita mér gegn neinum frambjóðendum hér.“ 

Arnar hvattur til að draga sig í hlé

Arnar Þór Jónsson viðurkenndi þá að hafa fengið svipuð skilaboð og Baldur. „Það kom mér á óvart að innanbúðarmenn, að minnsta kosti sem ég man svona í svipinn, í fremur rótgrónum stjórnmálaflokkum höfðu samband við mig og hvöttu mig af velvilja og vinsemd í minn garð að draga mig í hlé því Katrín væri að koma fram.“

Hann sagðist hafa svarað því að litlu liðin ynnu oft stóru liðin. „Og það er skemmtilegt að vera í litla liðinu að berjast við stóru liðin. Ég ætla ekki að gefa leikinn þó ég lendi kannski 2-0 eftir 20 mínútur.“ 

Jón Gnarr ítrekað hvattur til að hætta

Jón Gnarr sagði að strax eftir að Katrín tilkynnti um framboð sitt hefði hann verið spurður hvort hann vildi ekki draga sitt til baka. „Eins og ég sé eitthvað hræddur við Katrínu. Nei, bara ekki neitt.“ Hann segist hafa fengið mjög vinalegar sendingar þar sem hann er hvattur til að draga sig til baka. Hann dró þá upp símann og las eina slíka við mikinn fögnuð áhorfenda í salnum.

„Sæll Jón, 

mig langar að skora á þig að draga framboð þitt til baka og lýsa yfir stuðningi við Höllu Tómasdóttur eða Baldri, á móti Katrínu. Þú ert með spil í hendinni og getur með þessu tryggt að Katrín Jakobsdóttir verði ekki kosin forseti Íslands. Þú myndir koma mjög vel út ef þú myndir taka þessa ákvörðun fyrir þjóðina.

Gangi þér vel. Bestu kveðjur.“

Jón sagðist þó aldrei hafa komið til greina að draga sig til baka. „Ég er að fara að vinna þessar kosningar. Mér myndi aldrei detta í hug að draga til baka eitthvað svona. Ég er bara ekki þannig maður.“

Hér má horfa á kappræðurnar þar sem forsetaframbjóðendurnir sex sem mælast með mest fyrir samkvæmt kosningaspá Heimildarinnar mætast. Fyrstu 30 mínútur streymisins eru öllum aðgengilegar en áskrifendur geta horft á kappræðurnar í heild sinni: