Á vefsíðu Reykjavíkurborgar stendur þessi tilkynning, sem á að gilda fyrir veturinn 2023-2024 (frá 17. október 2023):

Tilvitnun byrjar:

Það er ekki bannað að nota nagladekk frá 1. nóvember til 15. apríl árlega en það er óæskilegt á götum borgarinnar (skv. þessu er auðvitað bannað að nota þau frá 15. apríl). Reykjavíkurborg hvetur því ökumenn til að hugsa sig tvisvar um áður en nagladekk fara undir bílinn og leita fremur að góðum vetrardekkjum.

Ónegld dekk fá háa einkunn á prófum

Í vetrardekkjakönnun sem unnin er af NAF í Noregi, sem er systurfélag FÍB á Íslandi, hefur komið fram að ónegld vetrardekk eru fullgildur kostur með tilliti til aksturseiginleika, hraða (grip), hemlunar, hávaða, rásfestu og aksturstilfinningar. Fjórar tegundir af naglalausum dekkjum skora frá 83-89 af 100 stigum í könnuninni. Það eru Continental VikingContact 7, Michelin X-Ice North 4, Goodyear UltraGrip Arctic 2 og Michelin X-Ice Snow. 

Ókostir nagladekkja í Reykjavík

Ókostir fylgja nagladekkjum, þau slíta malbiki margfalt meira en naglalaus vetrardekk og flýta fyrir djúpum raufum í malbikið sem getur skapað hættu. Nagladekk skapa hávaða sem hægt væri að koma í veg fyrir með því að velja góð vetrardekk í staðinn. Nagladekk auka einnig eldsneytiskostnað bifreiða.

Mikilvægt er því að draga úr hlutfalli slíkra nagladekkja á götum borgarinnar, því þau valda svifryki sem leggst í öndunarfæri og lungu fólks.

Dýpt mynsturs í hjólbörðum hefur áhrif á hversu gott grip þeirra er. Í reglugerð um gerð og búnað ökutækja er krafist þriggja millimetra lágmarksdýptar mynsturs á vetrardekkjum fólksbifreiða. Það dugar mjög vel í Reykjavík.

Nokkrar staðreyndir

• Bíll á nagladekkjum slítur malbiki og myndar svifryk allt að 40 sinnum hraðar en bíll á ónegldum vetrardekkjum. Sleppum nöglunum!

• Allt að 67 ótímabær andlát árlega má rekja til svifryks. Nagladekkjanotkun vegur einna þyngst í myndun þess. Sleppum nöglunum!

Tilvitnun lýkur.

Undirritaður bjó í tæplega 30 ár í Hamborg/Þýzkalandi. Þar er veðurfar oft svipað á veturna og hér á höfuðborgarsvæðinu. Í Þýzkalandi er notkun nagladekkja í megin atriðum bönnuð. Í tæplega 30 ár ókum við hjónin, á sitt hvorum bílnum, á góðum og vönduðum heilsársdekkjum. Lentum aldrei í slysi eða tjóni vegna hálku eða snjós allan þennan tíma.

Nú erum við búin að búa hér í 8 vetur. Aftur á 2 bílum. Okkar mat er, að notkun nagladekkja hér á höfuðborgarsvæðinu sé í raun algjörlega óþörf og ótrúlegt rugl. Dýr og stórskaðleg bábilja.

Til viðbótar við skemmdir og skaðlegt svifryk á götum, svífandi yfir byggðinni, valda nagladekk skaða á gólfi og spilla andrúmslofti í bílakjöllurum og -geymslum. För myndast í gólf og loft mengast. Svifryksslæðan, sem menn neyðast svo til að anda að sér, verður jafnvel sýnileg. 

Nefna má líka ástand í jarðgöngum. Í Hvalfjarðargöngunum sáust varla handaskil fyrir svifryksmekki á dögunum. Hugsa má líka til þess, að naglarnir geta valdið falskri öryggistilfinningu, sem getur leitt til óhappa og slysa, sem ella hefðu ekki orðið.

Þegar þetta er skrifað, er kominn 20. apríl. Í raun hefðu allir bíla, sem hafa verið á nagladekkjum í vetur, átt að vera komnir af þeim í síðasta lagi 15. apríl. En nagladekkjaglymurinn dynur áfram á fullu. Gróft talið virðist minnst annar hver bíll enn vera á nagladekkjum. Það eru margir dagar og vikur síðan að síðast sást hér snjór og/eða hálka, en nagladekkjadansinn dunar bara áfram.

Það undarlega, kaldhæðnislega, við þetta er, að lögreglan þykist hafa vald til að ákveða, að þetta megi bara vera svona, þangað til að henni þóknast að fara að sekta. Ég hef mest haldið, að það væri hlutverk lögreglu, að fylgja lögum og reglum, ekki að teygja þau og toga að eigin geðþótta.

Fyrir mér er þetta framferði lögreglunnar á höfuðborgarsvæðinu hreint hneyksli. Skaðsemi naglanna liggur fyrir í margfaldri mynd, jafnvel má rekja ótímabær dauðsföll allt að 67 manns á ári til þessa ósóma, og lögreglan lætur þetta bara ganga áfram, fram yfir lokadag, 15. apríl, í blíðskaparveðri, eins og að þetta sé ekkert mál, sem hún getur svo ráðskast með að vild og og eigin geðþótta.

Nýlega féll dómur fyrir Mannréttindadómstóli Evrópu, þar sem svissnesk stjórnvöld voru dæmd brotleg fyrir aðgerðarleysi í loftslagsmálum. Var þar þó um almennt, fremur lítið skilgreint aðgerðarleysi í baráttunni gegn hnattrænni hlýnun að ræða.

Áhugavert væri að sjá, hvað dómstóllinn myndi segja um linku, andvaraleysi og aðgerðarleysi stjórnvalda hér, þar sem fyrir liggur, að stórum hluta bíleigenda líðst að keyra á nagladekkjum stóran hluta ársins, mikið án nokkurrar þarfar, og, það með tilstyrk og framlengingu lögreglunnar.

Það er margt gott hér, en sumt, sem virðist skrýtið og lítt grundað. Menn geta velt því fyrir sér, hvort þetta stafi af andvaraleysi, hirðuleysi eða heimsku. Vonandi ekki öllu þrennu.