Skjálftavirkni í nýhöfnu kvikuhlaupi í Sundhnúksgígaröðinni sem hófst um miðjan dag færðist til suðurs í áttina að Grindavík og koðnaði niður. Þetta gerist í meirihluta kvikuhlaupa, að kvikan nær ekki til yfirborðsins, eða í um 60% til 80% tilfella.

Öflug smáskjálftahrina hófst í Sundhnúksgígaröðinni klukkan 15.55 í dag. Um 600 til 800 gestir Bláa lónsins heyrðu viðvörunarflautur og var gert að yfirgefa lónið. Í fréttum RÚV kom fram að bílar ferðamanna væri innan við lokunarpósta, þar sem fólk freistaði þess að ná myndum af upphafi nýs goss.

Kvikuhlaupið kemur úr kvikuhólfi sem liggur beint undir Svartsengi og þar með Bláa lóninu. Jarðfræðingar gera ráð fyrir því að kvika komi áfram upp austan við Bláa lónið, á sprungu sem liggur frá suðvestri í Grindavík norðaustur eftir Sundhnúksgígaröðinni. Þorvaldur Þórðarson eldfjallafræðingur segist í viðtali við Rás 2 ekki útiloka að gos komi upp beint í Svartsengi, í eða við Bláa lónið. 

„Það er náttúrulega alltaf möguleiki á að þetta fari beint upp. Við getum ekki útilokað þá sviðsmynd. Og það er allra versta tilfellið sem við getum fengið því þá er gossprungan inni á Svartsengissvæðinu. Það er náttúrulega ekki gott.“

Ferðamenn við nýja hrauniðÍ gær, rétt eins og eftir rýminguna seinni partinn í dag, voru ferðamenn að skoða hraunið sem rann yfir Grindavíkurveg í síðasta gosi.

Mynd: Golli

Uppfært hættumat VeðurstofunnarMjög mikil hætta er á svæðunum sem merkt eru fjólublá á uppfærðu hættumatskorti Veðurstofunnar. Þar er gert ráð fyrir gosopnun án fyrirvara, rétt eins og í Grindavík sjálfri.

Mynd: Veðurstofa Íslands

Kvikan hefur hins vegar fundið glufu sem liggur eftir sigdal og sprunguna í átt til suðvesturs inn í Grindavík.

„Það virðist vera þannig ástandið þarna að skorpan sem þekur Svartsengissvæðið er þéttari í sér og sterkari. Hún er ekki eins brotin eins og svæðið sitt hvorum megin, eins og svæðið þar sem Sundhnúkar eru og svo aftur á móti þar sem Eldvörp eru. Kvikan er, eins og margir vökvar, að hún leitar eftir auðveldustu leiðinni,“ segir Þorvaldur við RÚV.

Staðsetning skjálftahrinunnar nú var fyrst við suðurenda gossprungunnar sem úr gaus 18. desember í öðru eldgosinu norðan Grindavíkur af þremur. Það fjórða virtist í aðsigi í dag, en líklega var um goslaust kvikuhlaup að ræða.

„Aflögunin sem nú mælist er mun minni en hefur áður mælst í aðdraganda eldgosa. Það gæti bent til þess að minni kvika sé á ferðinni nú en í fyrri eldgosum,“ segir í tilkynningu Veðurstofunnar. Komi til goss er því líklegt að verði smærra en þau fyrri.

Upphaflega var talið mjög líklegt að fjórða gosið væri í aðsigi norðan við Grindavík. Á sjötta tímanum dró þó úr skjálftavirkni og Veðurstofan dró í land. „Dýpi skjálftavirkninnar bendir ekki til þess að kvika sé að brjóta sér leið til yfirborðs eins og staðan er núna,“ sagði á vef Veðurstofunnar.  „Ein þeirra sviðsmynda sem nefnd hefur verið er að kvikuhlaup verði án þess að til eldgoss komi.“

Enn er verulega líklegt að gos nái yfirborði á næstu dögum, jafnvel þótt kvikuhlaup nú gæti frestað gosi. „Það getur tekið einhverja daga í viðbót fyrir geymsluhólfið að ná að fyllast svo eitthvað fari að gerast,“ segir Þorvaldur Þórðarson jarðfræðingur í viðtali við Rás 2.