L.O.L.-dúkkur eru á meðal þess sem finna má á óskalista fjölda ungra stelpna fyrir þessi jól. Lýsa má L.O.L.-dúkkunum, eða „Li'l Outrageous Littles“ eins og skammstöfunin stendur fyrir, sem eins konar blöndu af Barbie og Bratz-dúkkunum.
Hrönn Sveinsdóttir, húsmóðir í Vesturbænum, ætlaði að uppfylla jólaósk sjö ára dóttur sinnar og keypti L.O.L. dúkku í vefverslun Kids Coolshop nýverið. Hún kostaði 9.999 krónur en Hrönn lét sig hafa það, hún fylgist vel með verði á mörgum vörum sem seldar eru á alþjóðlegum markaði og segist vel skilja að verðlag sé almennt hærra á Íslandi. „En varðandi þessar dúkkur þá fékk ég eiginlega bara áfall. Þetta er ómerkilegt plastdrasl sem er eins alls staðar. Ég skil ekki hvað orsakar svona mikinn mun?“ segir Hrönn í samtali við Heimildina.
Í öðrum erindagjörðum rakst Hrönn á L.O.L.-dúkkurnar á vefverslun Target þar sem þær kosta á bilinu 13 til 14 dollara á útsölu, eða sem nemur um 1.800 krónum, og 20 til 22 dollara, eða 2.800 til 3.050 krónur, á fullu verði. Algengasta verðið á sams konar dúkkum hjá Kids Coolshop er á bilinu 9.999 til 12.999 krónur.
„Þessi ljóta dúkka mun gleðja á jólunum“
Samanburður Hrannar leiðir í ljós að álagningin er á bilinu 263 til 326 prósent og ýktasta dæmið sýnir dúkku sem kostar 12.999 krónur hjá Kids Coolshop en 17,49 dollara í Target. Það er 441 prósent álagning.
Hrönn fór að efast um kaupin og hafði samband við Kids Coolshop á Íslandi og spurði út í verðlagninguna en fékk aðeins svör frá „starfsmanni á plani“, sem sagði henni að ef hún væri óánægð gæti hún beint viðskiptum sínum annað. „Þetta er örugglega versta svar sem maður getur fengið,“ segir Hrönn. Erindi hennar var samt sem áður áframsent á Ólaf Hrafn Halldórsson, rekstrarstjóra Kids Coolshop á Íslandi.
Gefur ekki upp kostnaðarverð
Ólafur segir það ekki eðlilegar upplýsingar að gefa upp kostnaðarverð leikfanganna á opinberum vettvangi. „Ég labba ekki um búðina og gef upp innkaupaverðið,“ segir hann í samtali við Heimildina. Kids Coolshop er hluti af danskri keðju og vörurnar koma þaðan og verðlaginu í Danmörku er fylgt, að sögn Ólafs. „Ég hef ekki náð að kanna þetta nógu vel, við erum í miðju jólastressi,“ segir Ólafur, sem fullyrðir að verðlagið hafi haldist það sama í mörg ár. „Verðbólgan hefur vissulega áhrif og flutningskostnaður hefur farið hækkandi. Það fylgir okkur eins og plága. Að öðru leyti þá er þetta eins og það er. Það er ekkert búið að gerast hjá okkur sem olli því að hlutir hækki sérstaklega mikið.“
„Ég labba ekki um búðina og gef upp innkaupaverðið“
Verðbilið á L.O.L.-dúkkum og tengdum varningi er á ansi breiðu bili hjá Kids Coolshop á Íslandi, allt frá 2.999 krónum fyrir litla dúkku upp í 49.999 krónur fyrir LOL Surprise - OMG Fashion Mega Runway Playset, sem inniheldur tvær stórar dúkkur, tíu litlar og allt sem þarf til að setja upp tískusýningu, svo sem tískupall.
Kids Coolshop er með sérstaka verðvernd. Á heimasíðu Coolshop segir að verslunin elski „að gefa þér besta verðið og bestu þjónustuna!“ Ef viðskiptavinir finna sams konar vöru á lægra verði tryggir Coolshop að verðið sé lægra hjá þeim. En verðverndin miðast aðeins við aðrar verslanir á Íslandi. Ólafur segir það ekki algengt að neytendur hafi samband vegna verðverndarinnar.
„Auðvitað er þetta ekki frábært“
Ólafur tekur ábendingu Hrannar vel. „Ég hef rennt yfir verðin og auðvitað er þetta ekki frábært, þetta lítur ekki vel út. Auðvitað könnum við það frekar og sjáum hvort eitthvert svigrúm sé til staðar til að lagfæra þetta. En þetta er verðlag sem við erum með hjá okkur og fylgir verðlagi á Norðurlöndunum. Ég sé ekki fyrir mér að það sé eitthvað óeðlilegt í gangi.“
Hrönn segir dæmið um L.O.L.-dúkkurnar aðeins eitt lítið dæmi sem sýni okursamfélagið sem Ísland er. „Svona á verslun ekki að virka á Íslandi, þó að við séum eyja. Það er engin samkeppni. En þetta er það sem börnin okkar vilja. Mig langar ekkert að gefa dóttur minni svona dúkku, en hún er á óskalistanum. En þessi ljóta dúkka mun gleðja á jólunum.“ Sjálf segist hún ekki vita af hverju hún sé að æsa sig svona mikið yfir þessu, hún hafi engan tíma í þetta. „Mögulega er ég að fá útrás fyrir allt jólastressið mitt.“
Hún hefur nú tekið ákvörðun um að skila dúkkunni. „Látum við bara allt yfir okkur ganga? Ég ætla að skila þessari dúkku. Þetta er hinn sanni andi jólanna sem er að koma yfir mig, að vera í réttlátu reiðikasti yfir þessu máli. Ég neita að taka þátt í þessu rugli.“
Hrönn er auk þess búin að komast að því að hún keypti ranga dúkku eftir allt saman. „Hún vill þessa með bleika hárið.“ Hrönn ætlar kannski að kaupa þá bleiku, en ekki hjá Kids Coolshop. „Ég get gert það annars staðar. Á uppsprengdu verði.“
Athugasemdir (3)