„Þetta mál er mér ekki til sóma og mér þykir það mjög leiðinlegt.“ Svona hefst stutt yfirlýsing sem Arndís Anna Kristínardóttir Gunnarsdóttir, þingkona Pírata, hefur sent frá sér.
Þar segir hún að á föstudagskvöld, þegar hún var handtekin á skemmtistaðnum Kiki, hafi hún verið „búin að drekka of mikið og brást illa við þegar dyraverðir opnuðu hurðina á klósettinu, ég var dónaleg og streittist á móti. Óháð öllu öðru, var hegðun mín ekki til fyrirmyndar.“
Arndís Anna segir að hún hafi beðið hlutaðeigandi afsökunar á framkomu sinni. „Það eru forréttindi að vera kjörinn fulltrúi, því fylgir ábyrgð og mér þykir leitt að hafa brugðist svona við.“
Þingmaðurinn var handtekin á föstudagskvöld eftir að hafa verið talsverðan tíma inni á klósetti skemmtistaðarins Kiki. Dyraverðir staðarins ætluðu vegna þessa að vísa henni út af staðnum. Við það komst hún í mikið uppnám og lögreglan var kölluð til.
Arndís Anna greindi frá málinu í færslu á Facebook í gær, í kjölfar þess að mbl.is hafði greint frá handtöku hennar. Þar sagði meðan annars: „Ég brá mér á skemmtistað á föstudagskvöld, eins og gengur og gerist, og fór á einn minn uppáhaldsstað, Kiki. Ég fór á salernið og var búin að vera þar sjálfsagt í talsverðan tíma þegar dyraverðir opna hurðina.
Mér brá við þetta og við að það stæði til að bera mig út með valdi, þegar mér fannst ekki tilefni til. Ég hef skilning á því að starf dyravarða á skemmtistöðum sé erfitt og ekki síst með fullt hús af fólki í misjöfnu ástandi, þó mín upplifun hafi verið sú að þarna hafi framganga þeirra verið óþarflega harkaleg og niðurlægjandi. Ég hef talað við fyrirsvarsmann staðarins sem bað mig afsökunar fyrir þeirra hönd, sem mér þykir afar vænt um.“
Í færslunni í fær sagðist Arndís Anna vera þakklát lögreglunni fyrir þeirra viðbrögð og fagmennsku, og fyrir alúðina sem þau sýndu sér í kjölfarið, enda hafi hún komist í talsvert uppnám við það sem hún kallar aðfarir. „Það að lögreglan taki útkall frá hinsegin skemmtistað alvarlega, hvers eðlis sem það er, og bregðist svona skjótt við er sérstaklega mikilvægt og yljaði það mér um hjartaræturnar í öllum þessum ósköpum."
Heimildin greindi frá því fyrr í dag að samkvæmt frétt sem birtist á vefmiðlinum Nútímanum í morgun staðfestu „heimildarmenn innan lögreglunnar á höfuðborgarsvæðinu“ við miðilinn í hvernig ástandi Arndís Anna hefði verið þegar lögreglan kom á vettvang á skemmtistaðnum Kiki aðfararnótt laugardags; að hún hefði verið „dáin áfengisdauða,“ upplýsingar sem lögreglan hefur ekki gefið út opinberlega.
Samkvæmt svörum lögreglunnar á höfuðborgarsvæðinu við fyrirspurn Heimildarinnar verða þessar staðhæfingar sem þarna koma fram teknar til skoðunar. Sé þetta rétt, að slíkar upplýsingar hafi borist frá lögreglunni sé það „óheimilt,“ samræmist ekki vinnureglum lögreglunnar og sé brot á trúnaði.
Athugasemdir