Heilbrigðisráðuneyti Willums Þórs segir þagnarskyldu ríkja á aðstoðarmanninum

Heil­brigð­is­ráðu­neyti Willums Þórs Þórs­sonar segir að þagn­ar­skylda hvíli á aðstoð­ar­mönnum ráð­herra eftir að þeir láta af störfum. Heim­ildin spurði heil­brigð­is­ráðu­neytið fimm spurn­inga um starfs­lok og vista­skipti aðstoð­ar­manns Willums Þórs, Guðrúnar Ásu Björns­dóttur, nú í nóv­em­ber. Guðrún Ása réði sig til einka­rekna heil­brigð­is­fyr­ir­tæk­is­ins Klíník­ur­innar. Ráðu­neytið svar­aði hins vegar ekki spurn­ingum Heim­ild­ar­innar nema að hluta til. 

Í lok svars ráðu­neyt­is­ins segir um þagn­ar­skyld­una sem hvílir á henni: „Þá er rétt að vekja athygli á því að í 1. mgr. 5. gr. laga nr. 64/2020, um varnir gegn hags­muna­á­rekstrum í Stjórn­ar­ráði Íslands, og í 42. gr. stjórn­sýslu­laga nr. 37/1993, er kveðið á um þagn­ar­skyldu starfs­manna, þ.m.t. aðstoð­ar­manna ráð­herra, sem helst þótt látið sé af starfi.“

Ein af spurn­ing­unum sem ráðu­neytið svar­aði til dæmis ekki er hvort það sjái ein­hverja van­kanta eða ágalla á því að aðstoð­ar­maður ráð­herra ráði sig svo snögg­lega til einka­rek­ins heil­brigð­is­fyr­ir­tækis og raun ber vitni í til­felli Guðrúnar Ásu. 

Sat fundi með stjórnendum Landspítalans

Guðrún Ása mun hefja störf sem fram­kvæmda­stjóri hjá Klíník­inni í byrjun næsta árs, innan við tveimur mán­uðum eftir að hún lét af störfum hjá ráð­herra. Miðað við svar ráðu­neyt­is­ins má hún ekki nýta neinar upp­lýs­ingar sem hún komst yfir í ráðu­neyt­inu í starfi sínu hjá Klíník­inni. 

Þórunn Svein­bjarn­ar­dóttir, þing­maður Sam­fylk­ing­ar­innar og for­maður stjórn­skip­unar- og eft­ir­lits­nefndar, hefur sagt að fyrir henni líti vista­skipin ein­kenni­lega út. „Mér finnst þetta orka tví­mælis. Aðstoð­ar­menn ráð­herra eru eðli máls­ins sam­kvæmt ráðnir póli­tískt og sinna póli­tískum störfum í umboði ráð­herr­ans og búa þess vegna yfir upp­lýs­ingum og kontöktum sem ekki er víst að aðrir byggju yfir. Mín skoðun er að huga þurfi betur að þessu: Þannig að aðstoð­ar­menn ráð­herra geti ekki farið beint í eitt­hvert slíkt starf í sama mála­flokki.“

Heim­ildin hefur meðal ann­ars upp­lýs­ingar um að Guðrún Ása hafi setið fundi með yfir­lækni bækl­un­ar­skurð­deildar Land­spít­al­ans, Hirti Friðriki Hjart­ar­syni, í krafti starfs síns sem aðstoð­ar­maður. Klíníkin gerði fyrr á árinu um samn­ing um að gera lið­skipta­að­gerðir með þátt­töku Sjúkra­trygg­inga Íslands í fyrsta skipti og hefur verið gefið út að annar samn­ingur verði gerður við Klíník­ina fyrir næsta ár. 

Vistaskipti á krítískum tíma

Um þessar mundir ráð­gerir heil­brigð­is­ráðu­neytið að útvista enn frek­ari aðgerða­formum til einka­að­ila eins og Klíník­ur­innar með greiðslu­þátt­töku Sjúkra­trygg­inga Íslands.

Viskipta­skipti Guðrúnar Ásu eiga sér því stað á krítískum tíma þar sem upp­lýs­ingar um rík­is­rekstur í heil­brigð­is­kerf­inu sem liggja fyrir í ráðu­neyt­inu geta verið mik­il­vægar fyrir einka­að­ila eins Klíník­inni sem vilja gera fleiri aðgerðir með kostn­að­ar­þátt­töku rík­is­ins. 

Ekkert í gildandi bannar vistaskiptin

Engin ákvæði í gild­andi lögum um hags­muna­á­rekstra æðstu starfs­manna stjórn­ar­ráðs­ins banna slík vista­skipti aðstoð­ar­manna ráð­herra yfir til einka­rek­inna fyr­ir­tækja sem starfa á mál­efna­sviði ráð­herr­ans sem þeir störf­uðu undir. Í til­felli ráð­herra sjálfs, ráðu­neyt­is­stjóra og skristofu­stjóra í ráðu­neytum þá þurfa þeir að bíða í sex mán­uði eftir að þeir láta af störfum í ráðu­neytum áður en þeir ráða sig til einka­að­ila á sama sviði. Á meðan eiga þeir rétt á bið­launum.

Ákveðið var að aðskilja aðstoð­ar­menn ráð­herra frá þessum hópi í lögum sem sett voru á Alþingi á síð­asta kjör­tíma­bili.Þess vegna getur Guðrún Ása ráðið sig í starfið hjá Klíník­inni án þess að þurfa að bíða í sex mán­uði líkt og gildir um ráð­herra sem og ráðu­neytis- og skrif­stofu­stjóra.