Krafin um endurgreiðslu launa – „Hvílík vanvirðing“

Margrét Erla Maack segir farir sínar ekki sléttar af sam­skiptum við fyrr­ver­andi eig­endur Torgs og þrotabú fyr­ir­tæk­is­ins. „Leikrit“ er orð sem hún notar til að lýsa því sem á hefur gengið. Hún er nú komin í ein­kenni­lega stöðu, fékk ekki greitt fyrir vinnu sína í mars, mán­uð­inn sem fyr­ir­tækið varð gjald­þrota, og einnig sögð skulda þrota­bú­inu febr­ú­ar­launin sín.  

Í upp­hafi árs, þegar hætt var að bera Frétta­blaðið í hús, greindi fjöl­miðla­konan Margrét Erla, sem vann á sjón­varps­stöð­inni Hring­braut, yfir­mönnum sínum frá því að „ef það þyrfti að losa fólk úr vinnu til að spara pen­ing“ væri hún til í að hætta. Lítið var gert úr þessum áhyggjum hennar en aðeins nokkrum vikum seinna eða í lok mars var útgáfu­fé­lag miðl­anna, Torg, lýst gjald­þrota. Í kjöl­farið varð ljóst að Margrét fengi ekki greitt fyrir vinnu sína í mars­mán­uði enda væri hún svo­kall­aður „gervi­verk­taki“. Í færslu sem hún birti á Facebook-síðu sinni í dag seg­ist hún hvetja fólk eftir fremsta megni til að forð­ast slíkar ráðn­ingar og við­skipta­sam­bönd. „Engin rétt­indi, ekki til­kall í ábyrgð­ar­sjóð launa.“

Stórt högg

Margrét skrifar að krafa hennar fyrir vinnu­fram­lag í mars hafi numið 765.900 krónum en Torg, „í krafti lög­manna sinna af Lex“ hafi neitað að við­ur­kenna þetta for­gangs­kröfu í þrota­búið. „Það er and­skoti stórt högg að vinna heilan mánuð og fá ekk­ert af því greitt. Í ofaná­lag að vera ákveðið and­lit sjón­varps­stöðvar þennan tíma. Hvílík van­virð­ing.“

Í sumar seg­ist hún svo hafa mætt „á eitt­hvað voða­legt leik­rit á Lex“ er þar fór fram skipta­fundur. Við­staddir voru meðal ann­arra Helgi Magn­ús­son, sem átti Torg, og Jón Þórisson sem var for­stjóri fyr­ir­tæk­is­ins. Á þessum fundi segir Margrét Erla þá hafa fengið „ljósa­peru­mó­ment“ um að „sækja um pen­ing til fjöl­miðla­nefndar“ og er þar átt við umsókn um rík­is­styrk til handa fjöl­miðlum. Hann fengu þeir hins vegar ekki.

„Daginn eftir þennan fund hringdi Jón Þórisson í mig og bað mig um að skrifa pistla fyrir DV,“ segir Margrét, en Helgi keypti DV út úr Torgi er það hafði verið lýst gjald­þrota. Það gerði hann í gegnum fyr­ir­tækið Fjöl­miðla­torg sem hann hafði reyndar stofnað haustið 2022, nokkum mán­uðum eftir að Torg varð gjald­þrota.

„Ég hélt að þetta væri símaat,“ segir Margrét Erla um sím­talið, „en nei, svo var ekki.“ Hún seg­ist hafa gert Jóni ljóst að hún hefði engan áhuga á að vinna fyrir þetta fólk aftur á ævi sinni. Það skuld­aði henni pen­ing. „Og fékk þá hið gullna svar: „Þetta er nátt­úru­lega ekki saman fyr­ir­tækið.“

„Nei,“ svar­aði ég „en sama fólkið.“ Í þessu sím­tali hafi kannski sið­ferðið verið afhjúpað. „Ný kennitala, sama röddin.“

Margrét, sem er ein­stæð móðir, seg­ist hafa lagt mikið á sig til að vinna sig upp úr því „fjár­mála­gili“ sem launa­miss­ir­inn hefði valdið og loks farin að sjá til sólar er hún fékk ábyrgð­ar­bréf þess efnis að henni bæri að greiða til baka síð­asta reikn­ing­inn sem hún hafði fengið greiddan frá Torgi. Sá reikn­ingur var fyrir vinnu hennar í febr­úar og hafði hljóðað upp á rúm­lega 700 þús­und krónur.

„Ég er búin að vera orð­laus yfir þessu í nokkurn tíma og mjög lítil í mér,“ skrifar Margrét.. Í bréf­inu sagði að henni ætti að vera það ljóst að Torg hefði ekki verið borg­u­in­ar­að­ili fyrir reikn­ingnum þar sem um gjald­þrot félags­ins hefði verið fjallað í fréttum.

Tilboð og gagntilboð

Lögmaður Mar­grétar bauð þrota­bú­inu „skiptidíl“ sem fól í raun í sér að þar sem Torg skuld­aði henni laun í mánuð og segði nú hana skulda sér sam­bæri­lega upp­hæð kæmi málið út á sléttu. Þessu til­boði var hins vegar hafnað og gagntil­boð sett fram: Að Margrét greiddi til baka 80 pró­sent af „skuld“ sinni.

„Allt þetta er víst lög­legt,“ heldur Margrét áfram í færslu sinni. „Þrotabú Torgs neitar að greiða mér laun því ég var verk­taki. Þeir krefja mig um að end­ur­greiða laun því ég var verk­taki. Tveir mán­uðir sem ég vann á sjón­varps­stöð­inni Hring­braut í vaskinn.“

Hún seg­ist nú íhuga næstu skref og finnst erfitt að við­ur­kenna fyrir sjálfri sér að „jafn­ó­merki­legir hlutir og pen­ingar skuli hafa svona mikil og langvar­andi áhrif á geð­heilsu mína“.