Eftir tveggja ára búsetu Íslandi steig hin íslensku­mæl­andi Oriana Agudelo Pineda upp í flug­vél frá Íslandi til Venes­ú­ela í gær. Hún flaug með 180 sam­löndum sínum frá Venes­ú­ela til heima­lands­ins. Eftir á Íslandi urðu móðir Oriönu, systir, mágur og tvö systra­börn hennar. Þau hafa öll fengið hæli hér en það fékk Oriana ekki þar sem hún er með tvö­falt rík­is­fang – venes­ú­elskt og kól­umbískt. 

Oriana og fólkið sem fór upp í vél­ina fór sjálf­vilj­ugt eftir að hafa fengið neitun um hæli hér á landi. En þau bjugg­ust ekki við því sem myndi taka við á vell­inum. 

„Síðan við stigum út úr vél­inni hefur þetta verið algjör martröð,“ segir Oriana í skila­boðum til blaða­manns. „Ég vona að eng­inn annar ákveði að fara sjálf­vilj­ugur, það á eng­inn skilið að ganga í gegnum svona.“

Hún segir að fólkið hafi ekki fengið að hitta ætt­ingja sína sem biðu á vell­inum. Þá hafi þau verið kölluð í margar yfir­heyrslur hjá lög­reglu og rann­sókn­ar­lög­reglu. 

„Þau tóku myndir af okkur fyrir hverja yfir­heyrslu,“ segir Oriana. „Á einni mynd­inni áttum við að halda á skilti með núm­erum, eins og við værum dæmdir glæpa­menn.“

SalerniðSal­ern­is­að­staðan í hús­næð­inu sem fólkið dvelur í.

„Okkur er haldið gegn vilja okkar“

Fólkið hefur verið flutt í hús­næði þar sem það á nú að dvelja í tvo daga á meðan yfir­heyrslur fara fram. „Okkur er haldið gegn vilja okkar,“ segir Oriana. „Þetta var ofboðs­lega nið­ur­lægj­andi, eins og refs­ing fyrir að hafa farið úr landi.“

Úr faðmi fjöl­skyld­unnarOriana með fjöl­skyld­unni sinni á Íslandi áður en hún var send burt.

Mynd: Heiða Helga­dóttir

Í nokkur ár veittu íslensk stjórn­völd nán­ast öllum þeim Venes­ú­ela­búum sem sóttu hér um hæli við­bót­ar­vernd vegna slæmra aðstæðna í Venes­ú­ela. Fyrr á þessu ári stað­festi kæru­nefnd útlend­inga­mála nokkra nei­kvæða úrskurði Útlend­inga­stofn­unar í málum Venes­ú­ela­búa.

Þessu hafa Venes­ú­ela­búar mót­mælt harð­lega enda eru aðstæð­urnar í Venes­ú­ela enn mjög slæmar, glæpa­tíðnin þar er ein sú hæsta í heimi, fáir hafa aðgengi að heil­brigð­is­þjón­ustu og flestir almennir borg­arar eiga erfitt með að mæta grunn­þörfum sínum.

Oriana hefur sótt um dval­ar­leyfi á Íslandi á grund­velli fjöl­skyldu­sam­ein­ingar. Hún talar íslensku og var með vinnu í mót­töku á hót­eli hér á landi áður en hún var send burt. Hún von­ast til þess að geta komið aftur til Íslands eins fljótt og hægt er, að hún fái að faðma börn systur sinnar og móður sína á nýjan leik.