Hofgarðar ehf., félag í eigu Helga Magnússonar, tapaði rúmlega 2,5 milljörðum króna á árinu 2022 eftir að búið var að reikna inn 146 milljóna króna reiknaðan tekjuskatt vegna tapreksturs, sem reiknast sem tekjur. Alls var rekstrartapið því nálægt 2,7 milljörðum króna. Þetta kemur fram í nýbirtum ársreikningi Hofgarða.
Tapið skýrist að uppistöðu af því að virði hlutabréfa sem Hofgarðar eiga lækkuðu verulega í virði, eða um 1,6 milljarða króna á síðasta ári. Þá var bókfært 409 milljón króna sölutap af hlutabréfum auk þess sem Helgi færði niður kröfur um 707 milljónir króna.
Sú niðurfærsla var vegna lána sem Hofgarðar höfðu veitt Torgi, útgáfufélagi Fréttablaðsins og tengdra miðla, sem Helgi hefur átt að mestu undanfarin ár. Torg var tekið til gjaldþrotaskipta í vor og Fréttablaðið hætti að koma út í lok mars síðastliðins. Alls var kröfum upp á 1,5 milljarð króna lýst í búið.
Langhæsta krafan, upp á 988 milljónir króna, kom frá Hofgörðum.
Til skoðunar að rifta sölu
Heimildin greindi frá því í byrjun júlí að einungis um 100 milljón króna eignir væru á þeim tíma í þrotabúi Torgs. Síðan þá hefur Landsprent, systurfélag útgáfufélags Morgunblaðsins, keypt prentvél sem notuð var til að prenta Fréttablaðið fyrir ótilgreinda upphæð úr búinu auk þess sem búið reyndi að sækja um rekstrarstyrk í ríkissjóð sem ætlaðir eru fjölmiðlum í rekstri, en var hafnað.
Til skoðunar hefur verið hjá skiptastjóra Torgs hvort ástæða sé til þess að rifta samningi sem það gerði við Hofgarða í mars 2021. Þá keyptu Hofgarðar vörumerki fjölmiðla út úr Torgi og fyrir það segist Helgi, sem var eigandi beggja félaga, hafa greitt 480 milljónir króna. Auk þess keypti dótturfélag Hofgarða dv.is, hringbraut.is og Iceland Magazine á 420 milljónir króna úr þrotabúi Torgs í lok marsmánaðar 2023, á sama tíma og þeir tilkynntu starfsfólki Torgs að félagið væri að fara í þrot og að útgáfu Fréttablaðsins yrði hætt. Fyrir liggur að sú upphæð var ekki greidd í reiðufé ef miðað er við að eignir þrotabús Torgs duga ekki fyrir forgangskröfum.
Mikill hagnaður 2021 eftir sölu á hlut í Bláa lóninu
Þrátt fyrir mikið tap í fyrra eru Hofgarðar ekki á flæðiskeri statt. Félagið hagnaðist um 3,2 milljarða króna á árinu 2021, þar sem meginskýringin var sala á sex prósenta hlut félagsins í Bláa lóninu til fjárfestingafélagsins Stoða á því ári. Eigið fé Hofgarða fór úr 2,9 milljörðum króna í 5,2 milljarða króna milli áranna 2020 og 2021 vegna þessa.
Í fyrra dróst eigið féð saman vegna ofangreinds taps og þess að félagið borgaði upp 500 milljón króna langtímalán. Alls var eigið fé Hofgarða 3,6 milljarðar króna um síðustu áramót.
Helstu eignir félagsins eru hlutabréf í óskráðum félögum sem metin eru á rúmlega einn milljarð króna og skráð hlutabréf og hlutdeildarskírteini í hlutabréfasjóðum sem metin voru á rúmlega 1,6 milljarða króna í lok árs 2022. Þá átti félagið óefnislegar eignir sem metnar voru á 480 milljónir króna, en þar er væntanlega um að ræða vörumerki þeirra fjölmiðla sem Helgi keypti út úr Torgi árið 2021 á nákvæmlega þá upphæð.
Athugasemdir