Þórdís Kolbrún Reykfjörð Gylfadóttir, sem síðar í dag tekur við lyklunum að fjármála- og efnahagsráðuneytinu, verður 27 einstaklingurinn sem gegnir þeirri stöðu frá því að lýð­veldið Ísland var stofn­að. 

Hún verður þriðja konan til að taka við þessu einu valdamesta embætti landsins. Oddný Harð­­ar­dóttir varð fyrsta konan til að gegna emb­ætti fjár­­­mála­ráð­herra þegar hún tók við því á gaml­ár­s­dag 2011.

Oddný sat í emb­ætti í níu mán­uði og þá tók flokks­­systir hennar Katrín Júl­í­us­dóttir við. Hún sat í emb­ætt­inu í tæpa átta mán­uði. Því hafa konur verið fjár­­­mála­ráð­herrar á Íslandi í minna en 17 mán­uði frá árinu 1944.  

Klári Þórdís Kolbrún kjörtímabilið í þessu embætti, eins og formenn ríkisstjórnarflokkanna klifuðu á á blaðamannafundi í dag að myndi gerast, þá mun hún rúmlega tvöfalda þann tíma sem kona hefur haldið á prókúru fyrir ríkissjóð á lýðveldistímanum. 

Engin skýr æskilegur arftaki

Mikið var skrafað um þann ráðherrakapal sem gæti farið af stað eftir afsögn Bjarna Benediktssonar sem fjármála- og efnahagsráðherra á þriðjudag og spáð í spilin um hver myndi taka við því ráðherraembætti sem hann hefur meira og minna gegnt í rúman áratug. Hvernig sá kapall var lagður var kynntur á blaðamannafundi klukkan 11 í dag. Einu breytingarnar voru þær að Bjarni hefur stólaskipti við Þórdísi Kolbrúnu og færir sig yfir í utanríkisráðuneytið. 

Í könnum sem Maskína gerði í lok viku kom fram að enginn sitjandi stjórnarþingmaður stóð upp úr sem óska-kandídat landsmanna til að taka við fjármála- og efnahagsráðuneytinu. Flestir, alls tólf prósent aðspurðra, sögðu að Þórdís Kolbrúns væri sá einstaklingur sem þeim hugnast best til að taka við. Skammt á hæla hennar komu Lilja D. Alfreðsdóttir, menningar- og viðskiptaráðherra og varaformaður Framsóknarflokksins, og Guðlaugur Þór Þórðarson, umhverfis-, orku- og loftslagsráðherra, sem voru bæði nefnd af níu prósent svarenda. Einungis tvö prósent nefndu nafn Bjarna sem svar við þessari spurningu.