IKEA á Íslandi er langt komið með að klára sínar birgðir af Marabou súkkulaði en ákvörðun var tekin um það fyrr á þessu ári af IKEA í Svíþjóð að sölu á Marabou súkkulaði skyldi hætt í verslunum sænska húsgagnarisans. „Þau lögðu það til við alla markaði að fasa út birgðirnar,“ segir Stefán Rúnar Dagsson, framkvæmdastjóri IKEA á Íslandi, í samtali við Heimildina.

Spurður að því hvort hann hafi einhverja skoðun á aðgerðum sem þessum segist Stefán sýna þeim fullan skilning. „Þetta er náttúrlega ósanngjarnt stríð og við eigum ekki að vera að hvetja til þess eða ýta undir með viðskiptum. Það er í rauninni það eina sem ég hef að segja um það.“

Líkt og Heimildin hefur fjallað um þá er Marabou súkkulaði orðið að eins konar táknmynd í Svíþjóð fyrir sniðgöngu á vörum sem tengdar eru viðskiptaumsvifum í Rússlandi. Sífellt fleiri Svíar sneiða hjá súkkulaðinu jafnvel þó að allt Marabou súkkulaði sé framleitt í Svíþjóð. Ástæðan er sú að umsvif móðurfyrirtækis Marabou, Mondelēz, eru mikil í Rússlandi og Mondelēz er þar af leiðandi komið á svartan lista úkraínskra yfirvalda sem hvetja til sniðgöngu fyrirtækisins og vörum þess.

Slitu á öll tengsl við Rússland

Nýjar tegundir af súkkulaði munu koma í stað Marabou súkkulaðisins í hillum IKEA en að sögn Stefáns Rúnars mun það taka þónokkurn tíma að fá inn nýjar tegundir eða allt upp undir ár. „Sérstaklega ef að IKEA ætlar að láta framleiða eitthvað fyrir sig. Við erum með ákveðnar tegundir af súkkulaði sem eru framleiddar fyrir IKEA eingöngu. Þannig að ég hef ekkert heyrt að utan hvað þetta varðar annað en það að við kaupum ekki inn þessa súkkulaðitegund sem við vorum með þarna frá Marabou lengur,“ segir Stefán. 

Sölustopp á Marabou súkkulaði er ekki það eina sem innrás Rússa í Úkraínu hefur haft í för með sér fyrir rekstur IKEA um víða veröld, líkt og Stefán bendir á. „Í upphafi, fljótlega eftir að stríðið hófst, ákvað IKEA að loka öllum verslunum í Rússlandi. Sama var með framleiðslu á vörum, IKEA hætti allri framleiðslu á vörum í Rússlandi. Vörur IKEA eru framleiddar um allan heim og oft á tíðum sama varan hjá mörgum framleiðendum, að hætta framleiðslu í Rússlandi hafði þau áhrif að eitthvað varð um vöruskort, en það er komið að mestu leyti í lag í dag.“