Guð­laugur Þór Þórð­ar­son, umhverfis-, orku- og lofts­lags­ráð­herra, sagði í óund­ir­búnum fyr­ir­spurnum á Alþingi í dag að mikið verk væri eftir að vinna „þegar kemur að því að nýta verð­mætin sem eru í draslinu okkar [...]“

Guð­mundur Ingi Krist­ins­son, þing­maður Flokk fólks­ins, gagn­rýndi útflutn­ing Íslend­inga á rusli og fyr­ir­hug­aðan inn­flutn­ing á gróð­ur­húsa­loft­teg­undum. Inn­fluttri mengun yrði breytt í grjót með tækni íslenska fyr­ir­tæk­is­ins Carbfix. „Hvert erum við að stefna í lofts­lags og umhverf­is­málum?“ spurði Guð­mundur Ingi ráð­herr­ann.

Í síð­ustu viku afhjúpaði Heim­ildin sann­leik­ann á bak við end­ur­vinnslu mjólk­ur­ferna en í ljós kom að fern­urnar eru ekki end­ur­unnar, heldur fluttar erlendis þar sem þær eru brenndar og nýttar í orku­fram­leiðslu. Viðbrögð innan sam­fé­lags­ins við frétt­unum voru hörð enda hafa Íslend­ingar lagt metnað og tíma í að hreinsa og flokka mjólk­ur­fernur í umhverf­is­skyni. 

Verið að þróa tækni en drepa hvali

Úrvinnslu­sjóður, sem sér um að skapa hag­ræn skil­yrði fyrir end­ur­notkun og nýt­ingu úrgangs, heyrir undir umhverfis-, orku- og lofts­lags­ráð­herra. Eftir fund ráð­herra, Úrvinnslu­sjóðar og Sorpu fyrir nokkrum dögum var ákveðið að óháður aðili sinni fram­vegis eft­ir­lits­hlut­verki um að raun­veru­lega sé verið að end­ur­vinna fern­urnar. Einnig til­kynnti Sorpa að nú ætti að senda fern­urnar til Sví­þjóðar þar sem þær verða end­ur­unnar hjá fyr­ir­tæk­inu Fiskeby Board.

Guð­laugur Þór sagði hóp undir hans stjórn vera að skoða mögu­leg við­skipti við önnur lönd í Evrópu um inn­flutn­ing á gróð­ur­húsa­loft­teg­undum en að mark­miðið með þeim væri tekju­öflun. Þá gagn­rýndi Guð­mundur Ingi hugs­an­leg við­skipti enn frekar. „Ég segi ég bara: Guð hjálpi okkur ef þetta á að vera fram­tíðin.“

Umhverfis-, orku og lofts­lags­ráð­herra ítrek­aði að nátt­úran fang­aði gróð­ur­húsa­loft­teg­undir og nefndi þar föngun trjá­lendis og mögu­lega tækni þar sem þör­ungar gleypa gróð­ur­húsa­loft­teg­undir. Guð­laugur Þór hefur ekki for­dæmt hval­veiðar við Íslands­strendur en hvalir gleypa mikið magn af gróð­ur­húsa­loft­teg­undum úr umhverf­inu. 

„Ég vona að ég fái fleiri spurn­ingar,“ sagði Guð­laugur Þór er hann lauk svörum sínum. Ráðherra fékk engar frek­ari spurn­ingar frá þing­mönnum.