Aðal­steinn Leifsson lætur af emb­ætti rík­is­sátta­semj­ara á morgun, 1. júní, að eigin ósk, sam­kvæmt því sem segir í til­kynn­ingu frá félags- og vinnu­mark­aðs­ráðu­neyt­inu sem birt er á vef Stjórn­ar­ráðs­ins.

Aðal­steinn hefur gegnt emb­ætt­inu frá 1. apríl 2020, eða í rúm þrjú ár. Í til­kynn­ingu ráðu­neyt­is­ins segir að emb­ættið verði aug­lýst laust til umsóknar á næstu dögum.

Jafnfram kemur þar fram að ákveðið hafi verið að Ástráður Har­alds­son hér­aðs­dóm­ari verði tíma­bundið settur í emb­ættið frá og með morg­un­deg­inum og þar til skipað verður í emb­ættið.

Ástráður var einmitt sá sem leysti Aðal­stein af hólmi sem rík­is­sátta­semj­ari í deilu Eflingar og Samtaka atvinnu­lífs­ins í upp­hafi árs­ins.

Aðal­steinn taldi sig knú­inn til þess að víkja sæti í deil­unni í kjöl­far þess að Lands­réttur komst að þeirri nið­ur­stöðu að Efling hefði ekki þurft að afhenda emb­ætti rík­is­sátta­semj­ara kjör­skrá stétt­ar­fé­lags­ins, vegna miðl­un­ar­til­lögu sem emb­ættið hafði lagt fram.

Í kjöl­far þess máls var boðað að stjórn­völd hygð­ust leggja fram frum­varp sem gerði rík­is­sátta­semj­ara kleift að láta atkvæða­greiðslu fara fram um miðl­un­ar­til­lögur sínar.

Guð­mundur Ingi Guð­brands­son félags- og vinnu­mark­aðs­ráð­herra boð­aði svo í byrjun apríl að slíkt frum­varp yrði ekki lagt fram og sam­þykkt fyrir þing­lok í vor, þar sem við­hafa eigi frekara sam­ráð við verka­lýðs­hreyf­ing­una um málið.