Starfshópur á vegum innviðaráðherra telur ekki hægt að fullyrða, án frekari rannsókna, að áform Reykjavíkurborgar um íbúabyggð í Skerjafirði hafi það slæm áhrif á aðstæður fyrir flug að uppbyggingaráformin verði sett á ís.
Í skýrslunni, sem birt var í dag, segir þó að byggðin í Nýja Skerjafirði samkvæmt fyrirliggjandi skipulagi þrengi að starfsemi flugvallarins frá því sem nú er, breytingar verði á vindafari á flugvellinum og nothæfi hans skerðist.
Uppbyggingin verður sett af stað
Í tilkynningu á vef Stjórnarráðsins segir að innviðaráðuneytið og Reykjavíkurborg hafi tekið ákvörðun um að hafist verði handa við jarðvegsframkvæmdir og þar með undirbúning uppbyggingar í Nýja Skerjafirði.
Þá muni Reykjavíkurborg í samvinnu við Isavia yfirfara ákvæði í deiliskipulagi sem lúta að því að takmarka áhrif vinds við uppbyggingu og útfærslu byggðar og landmótunar á svæðinu, í samræmi við ábendingar starfshópsins.
Nýja hverfið í Skerjafirði hefur verið pólitískt bitbein á milli ríkis og borgar um nokkurt skeið. Deiliskipulagið sem samþykkt var 2021 gerir ráð fyrir að þar verði blönduð byggð með um 690 íbúðum, í framhaldi af eldra hverfi í Skerjafirðinum. Það er þó einungis fyrsti áfangi fyrirhugaðrar uppbyggingar.
Í maí í fyrra sagði Sigurður Ingi Jóhannsson innviðaráðherra í samtali við fréttastofu Stöðvar 2 að Reykjavíkurborg myndi ekki fá að hefja uppbyggingu hverfisins fyrr en búið væri að finna starfsemi Reykjavíkurflugvalllar nýjan stað.
Í aðdraganda þess höfðu skeytasendingar gengið á milli ráðuneytis hans, borgarinnar og Isavia vegna áforma sem borgin hafði um að hefja jarðvegsvinnu á svæðinu vegna fyrirhugaðrar byggðar.
Á endanum var þessu deilumáli siglt í hendurnar á starfshópi, sem nú hefur kannað fyrirliggjandi gögn og lendingin orðin sú að hverfið mun rísa.
Fulltrúi borgarinnar undirritaði með bókun
Í lokaorðum skýrslunnar er þess getið að það sé og verði ákvörðunaratriði stjórnvalda, rekstraraðila og notenda flugvallarins hvort og þá hvaða skerðing nothæfis sé ásættanleg fyrir flugið á Reykjavíkurflugvelli. Í greinargerð hópsins sé ekki lagt mat á þetta atriði.
Fulltrúi Reykjavíkurborgar í starfshópnum, Glóey Helgudóttir Finnsdóttir, undirritaði hins vegar skýrsluna með bókun, þar sem segir að niðurstaðan sé sú að fyrirhuguð byggð muni hafa í för með sér einhverjar breytingar en umfang þeirra sé óverulegt.
„Ekkert hefur því komið fram sem bendir til að aðstæður fyrir flug á Reykjavíkurflugvelli raskist það mikið að byggingaráformum í Skerjafirði skuli annað hvort frestað eða þau slegin af,“ segir í bókuninni.
Eyjólfur Árni Rafnsson var formaður starfshópsins og í honum sátu einnig Sveinn Valdimarsson frá Isavia, Ingvar Kristinsson frá Veðurstofu Íslands, Orri Eiríksson frá Öryggisnefnd Félags íslenskra atvinnuflugmanna og Þorgeir Pálsson frá Háskólanum í Reykjavík, auk Glóeyjar frá Reykjavíkurborg.
Ýmsar mótvægisaðgerðir mögulegar
Starfshópurinn rýndi samkvæmt því sem fram kemur í skýrslunni aðallega í fyrirliggjandi gögn úr skýrslum frá verkfræðistofunni Eflu og hollensku flugvísindastofnuninni NLR.
NLR hafði lagt til í sinni skýrslu að Isavia, rekstraraðili flugvallarins, myndi ráðast í mótvægisaðgerðir sem gætu m.a. falist í aukinni upplýsingagjöf til flugmanna við tiltekin veðurskilyrði og hins vegar söfnun raungagna með vöktun veðuraðstæðna og tilkynningum flugmanna um kviku eða aðstæður þar sem mikil ókyrrð hefði merkjanleg áhrif á flug.
Starfshópurinn sem innviðaráðherra setti saman segir svo í skýrslunni að skoða megi frekari aðgerðir, eins og takmarka hæð fyrirhugaðrar byggðar í Nýja Skerjafirði við flötinn 1:35 frá miðlínu flugbrautar.
Einnig megi skoða hvernig megi draga úr áhrifum frá jöðrum fyrirhugaðrar byggðar í Nýja Skerjafirði með annarri útfærslu skipulags og formun mannvirkja og skoða möguleg áhrif landslagsmótunar milli fyrirhugaðrar byggðar og flugvallarins til að draga úr áhrifum byggðarinnar.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir (1)