Rússneski útgerðarmaðurinn Vitaly Orlov hefur flutt eignarhaldið á útgerð sinni, Norebo, yfir á 33 ára gamlan son sinn, Nikita Orlov. Norska viðskiptablaðið Dagens Næringsliv greinir frá þessu í langri umfjöllun þar sem fram kemur að Vitaly Orlov hafi gert þetta vegna mögulegra viðskiptaþvingana Evrópusambandsins í garð útgerðar hans. Sonur Orlovs er nefnilega norskur ríkisborgari þar sem faðir hans bjó lengi og starfaði í Noregi. Norska blaðið tekur þó fram að hingað til hafi Evrópusambandið ekki sett Vitaly Orlov eða Norebo á neinn svartan lista vegna stríðsins í Úkraínu. 

Vitaly Orlov er umsvifamesti útgerðarmaður Rússlands og hafa íslenskir fjölmiðlar fjallað um hann nokkrum sinnum í gegnum tíðina vegna tengsla við útgerðarfélagið Samherja og Landsbankann. Norebo er í dag stærsta útgerðarfélag Rússlands sem ræður yfir mestum kvóta þar í landi og er með tekjur upp á tæplega 60 milljarða íslenskra króna. 

Fyrirtæki í eigu Orlovs, Murmansk Trawl Fleet, keypti meðal annars Afríkuútgerð Samherja, Kötlu Seafood, árið 2013 og Landsbankinn átti útistandandi lán hjá félagi hans. Í svörum upplýsingafulltrúa Orlovs til Stundarinnar, fyrirrennara Heimildarinnar, kom reyndar fram að viðskiptasamband Orlovs við Landsbankann næði aftur fyrir íslenska efnahagshrunið 2008.  Lánið frá Landsbankanum var með veði í togaranum Pavel Kutakhov sem veiddi hestamakríl í Vestur-Afríku, líkt og Stundin greindi. 

Í grein Dagens Næringsliv er rakið hvernig fyrirtæki Orlovs í Rússlandi hafi tengsl við Vladimír Pútín Rússlandsforseta og að þetta geti skapað vandamál fyrir þau. Talsmaður Norebo sakar norska blaðið hins vegar um Rússlandsfóbíu og hætti að svara spurningum þess.