Átján sóttu um starf dagskrárstjóra Rásar 1 sem auglýst var fyrir skemmstu, eftir að Þröstur Helgason sagði upp stöðu sinni. Tveir drógu umsókn sína til baka en í meðal þeirra sextán sem eftir standa er fjöldi kanóna úr stétt fjölmiðlafólks.

Meðal þeirra sem sem sóttu um stöðuna eru Gunnhildur Arna Gunnarsdóttir, blaðamaður á Læknablaðinu. Gunnhildur er fyrrverandi ritstjóri dagblaðsins 24 stunda og fyrrverandi umsjónarmaður Morgunútvarps Rásar 2.

Lára Ómarsdóttir fjölmiðlakona, sem nýverið lét af störfum sem samskiptastjóri fjárfestingafélagsins Aztiq, er einnig á meðal umsækjenda. Áður en Lára tók við stöðu samskiptastjóra þar hafði hún starfað í fjölmiðlum um árabil, sem fréttamaður og dagskrárgerðarkona, og síðast sem fréttamaður í fréttaskýringaþættinum Kveik á RÚV.

Þá sækir Þorfinnur Ómarsson, bróðir Láru, einnig um stöðuna en þau systkini eru sem kunnugt er börn Ómars Ragnarssonar fjölmiðlamanns, sem um árabil starfaði á Ríkisútvarpinu. Þorfinnur hefur starfað í fjölmiðlum um árabil og meðal annars stýrt Íslandi í dag á Stöð 2 og Vikulokunum á Rás 1, auk annars.

Fanney Birna Jónsdóttir lögfræðingur og blaðamaður er þá meðal umsækjenda en Fanney Birna á farsælan feril að baki í fjölmiðlum. Hún er fyrrverandi fréttastjóri Fréttablaðsins, fyrrverandi aðstoðarritstjóri Kjarnans og hafði umsjón með Silfrinu á RÚV um árabil.

Guðni Tómasson starfandi dagskrárgerðarmaður á Rás 1 er einnig meðal umsækjenda en hann stýrir þættinum Víðsjá og er fyrrverandi menningarritstjóri Fréttatímans.

María Björk Ingvarsdóttir sækir einnig um stöðuna en hún er fyrrverandi framkvæmdastjóri sjónvarpsstöðvarinnar N4, sem hætti starfsemi í byrjun febrúar. Tölvuverða athygli vakti í desember síðastliðnum þegar meirihluti fjárlaganefndar Alþingis ákvað að veita 100 milljóna króan framlag til reksturs fjölmiðla á landsbyggðinni sem framleiddu sjónvarpsefni, eftir að María Björk fór fram á að fá slíkan styrk í beiðni til nefndarinnar. Ekki síst vakti ákvörðunin athygli í ljósi þess að mágur Maríu Bjarkar, Stefán Vagn Stefánsson, situr í meirihluta fjárlaganefndar. Hins vegar var dró fjárlaganefnd í land með veitingu styrksins eftir gagnrýni í fjölmiðlum. María Björk er fyrrverandi fréttamaður á Ríkisútvarpinu og starfaði meðal annars hjá svæðisútvarpinu á Norðurlandi.

Þorsteinn J. Vilhjálmsson er þá meðal umsækjenda en Þorsteinn hefur starfað í fjölmiðlum í áratugi, ýmist hjá fjölmiðlafyrirtækjum eða sjálfstætt. Hann var meðal annars einn stjórnenda í Íslandi í dag á Stöð 2 og hefur starfað bæði á RÚV og Bylgjunni, svo eitthvað sé nefnt. Á síðasta ári fluttti RÚV þætti Þorsteins um Skeggja Ásbjarnarson kennara, þar sem flett var ofan af brotum hans gegn nemendum sínum og vöktu þeir mikla athygli.

Auk þessara umsækjenda má nefna að meðal annarra sem sækja um eru Júlía Margrét Einarsdóttir sem er verkefnastjóri vefútgáfu og dagskrárgerðarkona á RÚV, Hjálmar Hjálmarsson leikari, Matthías Tryggvi Haraldsson, sem titlaður er texta- og hugmyndasmiður en er kannski þekktastur fyrir að vera meðlimur hljómsveitarinnar Hatara og Magnús Lyngdal Magnúson sérfræðingur en hann er eiginmaður Ragnhildar Thorlacius, dagskrárgerðarkonu á Rás 1.

Umsækjendur eru eftirfarandi

• Ásgrímur Geir Logason leikari og leikstjóri
• Fanney Birna Jónsdóttir lögfræðingur og blaðamaður
• Guðni Tómasson dagskrárgerðarmaður og framleiðandi
• Gunnar Karel Másson tónskáld
• Gunnhildur Arna Gunnarsdóttir blaðamaður
• Hjálmar Hjálmarsson framleiðandi og leikari
• Jón Hjörtur Sigurðarson vefsíðugerð og netmarkaðssetning
• Júlía Margrét Einarsdóttir verkefnastjóri vefútgáfu og dagskrárgerðarkona
• Lára Magnúsdóttir sagnfræðingur og rithöfundur
• Lára Ómarsdóttir fv. Samskiptastjóri
• Magnús Lyngdal Magnússon sérfræðingur
• María Björk Ingvadóttir fv. framkvæmdastjóri
• Matthías Tryggvi Haraldsson texta- og hugmyndasmiður
• Óli Valur Pétursson verkefnafulltrúi
• Þorfinnur Ómarsson upplýsinga- og samskiptastjóri
• Þorsteinn J. Vilhjálmsson blaðamaður, dagskrárgerðarmaður og ritstjóri