Fyrri aukaspurning:

Hver er þetta?

***

Aðalspurningar:

1.  Árið 2018 vakti mikla athygli þegar ungir piltar í fótboltaliði lokuðust inni í djúpum helli og kostaði mikið erfiði að koma þeim út. Í hvaða landi gerðist þetta?

2.  Auðkýfingur einn bauð fram aðstoð sína við að ná piltunum út en lenti síðan í málaferlum eftir að hafa nítt skóinn af einum þeirra kafara sem tóku þátt í að bjarga þeim. Auðkýfingurinn var sýknaður af kröfu um bætur vegna meiðyrða en hver er hann?

3.  Fréttakona sem hafði verið hjá Kveik á RÚV hætti fyrir tveim árum og fór að vinna sem upplýsingafulltrúi hjá Robert Wessmann eða fyrirtækjum hans. Hún lét svo af störfum þar um daginn. Hvað heitir hún?

4.  Páley Borgþórsdóttir, við hvað starfar hún? Hér þarf svarið að vera nákvæmt.

5.  Hvaða fjörður er milli Siglufjarðar og Ólafsfjarðar?

6.  Hvaða teiknimyndapersóna á einkar mikilvægan lukkupening, sem mun vera fyrsti peningurinn sem persónan græddi á ævinni?

7.   Árið 2012 fékk diskur með ljóðaflokknum Vetrarferðinni Íslensku tónlistarverðlaunin í flokki sígildrar- og samtímatónlistar. Þar söng Vetrarferðina einn kunnasti söngvari Íslendinga síðustu áratugina, karl sem hóf feril sinn sem barítón en færði sig svo niður í bassa. Hver er sá söngvari? 

8.  Undirleikari á þessum diski var heldur enginn aukvisi, heldur hefur haslað sér æ stærri völl sem einkleikari á píanó síðasta hálfa annan áratuginn og komið víða fram og fengið mikið lof. Hann heitir ... hvað?

9.  En ljóðaflokkurinn Vetrarferðin eða Winterreise, hver samdi annars lögin í þeim víðfræga flokki? Svo er vetrarstig fyrir þá fáu sem vita hver samdi LJÓÐIN í Vetrarferðinni!

10.  Í hvaða landi er höfuðborgin Lima?

***

Seinni aukaspurning:

Þótt myndin sé ekki góð, þá ættu nú þau sem til þekkja að bera kennsl á konuna á myndinni hér að neðan.

***

Svör við aðalspurningum:

1.  Taílandi.

2.  Elon Musk.

3.  Lára Ómarsdóttir.

4.  Lögreglustjóri á Norðurlandi eystra.

5.  Héðinsfjörður.

6.  Jóakim Aðalönd.

7.  Kristinn Sigmundsson.

8.  Víkingur Heiðar.

9.  Schubert. — Ljóðin samdi Müller nokkur.

10.  Perú.

***

Svör við aukaspurningum:

Á efri myndinni er söngkonan Rihanna.

Á neðri myndinni er Ásta Sigurðardóttir.