Knattspyrnumaður sem lék með Aftureldingu í næstefstu deild Íslandsmóts karla í fyrra veðjaði á hundruð knattspyrnuleikja hérlendis síðasta sumar, í hinum ýmsu deildum og flokkum, þar á meðal fimm leiki hjá hans eigin liði. Fjórum þessara leikja tók leikmaðurinn, Sigurður Gísli Bond Snorrason, sjálfur þátt í.
Aga- og úrskurðarnefnd KSÍ er með málið til meðferðar, í kjölfar þess að Klara Bjartmarz framkvæmdastjóri KSÍ vísaði því þangað 13. desember vegna meintra brota leikmannsins á lögum og reglugerðum KSÍ. Nefndin sendi samdægurs erindi á Sigurð Gísla, sem fékk frest til 20. desember til þess að bregðast við með skriflegri greinargerð, samkvæmt gögnum sem Heimildin hefur í sínum fórum.
Sigurður Gísli vildi ekki tjá sig um málið er Heimildin náði af honum tali.
Án fordæma hjá KSÍ
Þetta er í fyrsta sinn sem KSÍ fer fram með mál af þessu tagi gagnvart leikmanni, þó að nokkur umræða hafi á stundum skotið upp kollinum um að knattspyrnumenn á Íslandi taki þátt í veðmálum á íslenska knattspyrnu.
Reglur um þátttöku í veðmálastarfsemi eru þó nokkuð skýrar í lögum og reglugerðum KSÍ. Í reglugerð sambandsins um knattspyrnumót segir að þeim sem taki þátt í knattspyrnuleikjum á vegum KSÍ sé óheimilt að taka þátt í veðmálastarfsemi, með beinum eða óbeinum hætti, í tengslum við eigin leiki og eigin mót. Því til viðbótar er öllum knattspyrnumönnum sem samningsbundnir eru íslenskum liðum samkvæmt staðalsamningi KSÍ, eins og Sigurður Gísli var, óheimilt að veðja á leiki í íslenska boltanum.
Ljóst er af veðmálayfirliti sem veðmálafyrirtækið Pinnacle sendi til KSÍ að Sigurður Gísli, sem er fæddur árið 1995 og nú skráður í knattspyrnuliðið KFK eftir að hafa leikið 21 leik með Aftureldingu síðasta sumar, virðist hafa þverbrotið reglur sambandsins hvað þetta varðar.
Fór yfir ákveðinn „þröskuld“ hjá veðmálafyrirtækinu
Baksaga málsins er rakin í greinargerð framkvæmdastjóra KSÍ til aga- og úrskurðarnefndar. Þar kemur fram að upp úr miðjum nóvember hafi starfsmaður heilindamála hjá Evrópska knattspyrnusambandinu UEFA haft samband við Ómar Smárason, sem er svokallaður heilindafulltrúi KSÍ auk þess að vera samskiptafulltrúi sambandsins, og óskað leyfis til að tengja fulltrúa veðmálafyrirtækisins Pinnacle við sambandið.
Veðmál Sigurðar Gísla höfðu þá komið fram við vöktun viðskiptavina hjá Pinnacle. Fulltrúi fyrirtækisins segir í samskiptum við fulltrúa KSÍ, sem fylgdu greinargerðinni til aganefndar, að aðgangur Sigurðar Gísla hafi verið tekinn til skoðunar af í kjölfar þess að knattspyrnumaðurinn fór yfir ákveðinn „þröskuld“ hjá veðmálasíðunni, sem getur m.a. verið vegna mikillar virkni eða hárra upphæða sem lagðar eru undir í gegnum aðganginn.
Heilindafulltrúi KSÍ staðfesti við fyrirtækið að Sigurður Gísli væri sannarlega virkur leikmaður í íslenska fótboltanum og í kjölfarið sendi Pinnacle skrifstofu KSÍ svo gögn um veðmál leikmannsins frá júlí og fram í september á síðasta ári, sem starfsmenn KSÍ fóru yfir.
„Gögnin sem Pinnacle sendi KSÍ sýna hundruð veðmála þessa einstaklings á leiki á Íslandi, í flestum deildum Íslandsmóts meistaraflokka karla og kvenna, í bikarkeppnum meistaraflokka karla og kvenna, og í 2. flokki. Mikill fjöldi veðmála er á leiki hjá ákveðnum félögum (Afturelding, ÍH, Augnablik, Dalvík/Reynir) en heilt yfir er nokkuð mikil dreifing og ekki hægt að koma auga á sérstakt mynstur annað en það sem er hér að framan. Þó er rétt að nefna 12 veðmál á stakan leik (Ísbjörninn – Hvíti riddarinn í 4. deild karla, tapað veðmál) og 10 veðmál á annan stakan leik (Dalvík/Reynir – Vængir Júpíters í 3. deild karla, unnið veðmál),“ segir í greinargerðinni frá Klöru Bjartmarz.
Veðjaði aldrei gegn eigin liði
Sérstaklega er fjallað um að á meðal leikjanna sem Sigurður Gísli veðjaði á hjá Pinnacle hafi verið fimm leikir hjá hans eigin liði, meistaraflokki karla hjá Aftureldingu, og að hann hafi sjálfur tekið þátt í fjórum þeirra.
Í öll þau sem skipti sem Sigurður Gísli veðjaði á leiki Aftureldingar var hann að veðja á fleiri leiki í sama pakkaveðmáli, og lagði tiltölulega lágar upphæðir undir í hverju veðmáli. Stundum setti hann leiki Aftureldingar inn í fleiri en einn seðil, sem stundum unnust og stundum töpuðust.
Í eitt skiptið veðjaði Sigurður Gísli á að tiltekið mörg mörk yrðu skoruð í leikjum liðsins, t.d. að þrjú eða fleiri mörk yrði skoruð í leik gegn Fylki sem fram fór í Árbænum í byrjun september.
Oftast veðjaði hann þó á Afturelding hefði sigur, eða gegn Grindavík í júlí og gegn HK, Knattspyrnufélagi Vesturbæjar og Þrótti Vogum.
Veðmálaeftirlit UEFA fengið til að skoða leik gegn Fylki
Í greinargerð Klöru Bjartmarz segir að samkvæmt skýrslu virðist „ekki vera sérstakar vísbendingar um hagræðingu úrslita“, en einnig að KSÍ hafi þó óskað eftir áliti frá veðmálaeftirliti UEFA um einn leikjanna sem Sigurður Gísli tók þátt í og veðjaði sjálfur á.
„Sá leikur fór fram 2. september 2022 í Lengjudeild karla og var á milli Aftureldingar og Fylkis. Leikmaðurinn byrjaði leikinn og var tekinn út af í hálfleik í stöðunni 0-2 fyrir Fylki, sem urðu lokatölur leiksins. Niðurstöður álits UEFA eru að engar sérstakar vísbendingar séu um hagræðingu úrslita og mynstur veðmála í kringum leikinn metin eðlileg,“ segir framkvæmdastjóri KSÍ í greinargerð sinni vegna málsins.
Aga- og úrskurðarnefnd KSÍ hefur ekki enn komið saman á nýju ári, en viðurlög við brotum gegn lögum KSÍ geta meðal annars falist í leikbanni eða banni frá allri þátttöku í knattspyrnu, auk þess sem hægt er að gera leikmönnum refsingu eftir reglugerð um aga- og úrskurðarmál eða öðrum reglugerðum KSÍ.
KSÍ tjái sig ekki um mál á borði aganefndar
Klara Bjartmarz framkvæmdastjóri KSÍ segir í samtali við Heimildina að hún geti ekki tjáð sig efnislega um mál sem séu til meðferðar hjá aga- og úrskurðarnefnd sambandsins, sem sé sjálfstæð í sínum störfum.
Í samtali við blaðamann staðfestir hún þó að KSÍ hafi aldrei áður beint máli sem varði veðmál til aga- og úrskurðarnefndar sambandsins á þeim grundvelli sem nú er gert.
Dæmi um margra mánaða leikbönn í Englandi
Veðmál knattspyrnumanna hafa verið talsvert í deiglunni í Englandi að undanförnu. Einn marksæknasti framherji ensku úrvalsdeildarinnar, Ivan Toney leikmaður Brentford, var nýlega kærður fyrir að hafa brotið gegn reglum enska knattspyrnusambandsins um veðmál.
Þær reglur eru í stuttu máli þannig að fótboltamenn mega ekki veðja á fótboltaleiki, hvorki í Englandi né utan landsins. Reglurnar er Toney sagður hafa brotið í alls 262 skipti á árunum 2017 til 2021. Óljóst er hvaða refsing bíður Toney af hálfu enska knattspyrnusambandsins, en almennt er reiknað með því að hans bíði leikbann.
Leikmenn í Englandi hafa sumir hverjir fengið leikbönn eða fésektir fyrir að hafa brotið veðmálareglur. Árið 2017 var miðjumaðurinn Joey Barton til dæmis dæmdur í 18 mánaða langt leikbann, sem síðar var reyndar stytt niður í 5 mánuði, eftir að í ljós kom að hann hafði veðjað alls 1.260 sinnum á fótboltaleiki á árunum 2006-2016.
Athugasemdir