Ríkislögreglustjóri ætlar að funda með fulltrúum Isavia til að fara yfir hver hafi raunverulega tekið ákvörðun um að beina ljóskösturum í átt að myndavélum fjölmiðla til að byrgja sýn og koma í veg fyrir myndatökur. Blaðamenn Ríkisútvarpsins fylgdust með brottflutningi fimmtán hælisleitenda frá Íslandi til Grikklands, bæði í Hafnarfirði og svo fyrir utan athafnasvæði Isavia á Keflavíkurflugvelli. 

Í tilkynningu sem barst frá Isavia í gær kom fram að starfsfólk á flugvellinum hefði komið í veg fyrir myndatökur fjölmiðla að fyrirskipan lögreglu. Svo virðist sem embætti ríkislögreglustjóra sé ekki sátt við þá útskýringu en í svari við fyrirspurn Stundarinnar um málið segir að til standi að funda með forsvarsmönnum Isavia til að komast að því hver tók ákvörðunina. 

„Lögregla mun funda með ISAVIA í næstu viku í þeim tilgangi að fara yfir atvik málsins til að varpa ljósi á hvar ákvarðanataka liggur,“ segir í svarinu, sem síðan hefur verið sent öllum fjölmiðlum. „Ekki stóð til að hindra störf fjölmiðla en fjölmiðlar höfðu mun greiðara aðgengi að myndun aðgerða lögreglu á fyrri stigum sama máls.“

Í tilkynningu ríkislögreglustjóra segir einnig að lögð sé rík áhersla á að fjölmiðlar hafi gott aðgengi að störfum lögreglu, ekki síður þeim verkefnum sem eru sérstaklega krefjandi.

Fréttastjóri krefst svara

Eftir að Ríkisútvarpið greindi frá aðgerðum starfsmanna Isavia, þar sem fjórum bílum búnum flóðljósabúnaði var stillt upp gegnt blaðamönnum fréttastofu, sendi Heiðar Örn Sigfinnsson fréttastjóri ríkislögreglustjóra bréf þar sem hann krafði embættið svara. 

„Fréttateymi RÚV var á staðnum, utan girðingar, og fékk ekki að sinna sínum störfum þar sem starfsmenn ISAVIA fylgdu fyrirmælum lögreglunnar og skemmdu upptökurnar. Ég lít þetta að sjálfsögðu mjög alvarlegum augum enda man ég ekki eftir grófari dæmum um aðgerðir lögreglu gegn fjölmiðlafólki að störfum í seinni tíð,“ sagði hann í bréfinu, sem birt var á Facebook-síðu Heiðars.

Ein spurninganna sem hann beindi til Sigríðar Bjarkar Guðjónsdóttur ríkislögreglustjóra var: „Hvernig skilgreinir þú ríki þar sem lögregla beitir aðferðum sem þessum til að koma í veg fyrir að fjölmiðlar sinni sínu lýðræðislega hlutverki, nefnilega fréttaflutningi og eðlilegu aðhaldi við stjórnvöld?“