Fréttir

Forsetinn gagnrýnir þingmenn vegna stjórnarskrárinnar

Guðni Th. Jóhannesson forseti lýsti vonbrigðum með að þingmönnum hefði ekki tekist að klára breytingar á stjórnarskránni. Katrín Jakobsdóttir forsætisráðherra hafði lagt áherslu á sátt á þingi, en ekkert varð úr umbótum á stjórnarskrá.

Jón Trausti Reynisson

23. nóvember 2021 · 14:15

Birtist upphaflega í Stundinni fyrir 5 árum.

„Þess í stað réðust örlög stjórnarskrárfrumvarps í einhverju nefndarherbergi hér handan Austurvallar,“ sagði Guðni Th. Jóhannesson forseti í ræðu sinni við upphaf þingsetningar rétt í þessu, nú tæpum tveimur mánuðum eftir alþingiskosningar.

Guðni ávarpaði sérstaklega í ræðu sinni að hann hefði fyrir ári síðan lýst „þeirri von að unnt yrði að taka hófsamar tillögur að breytingu stjórnarskrár til efnislegrar afgreiðslu og leiða umræður til lykta í þessum sal“.

„Svo fór ekki,“ bætti hann við.

„Vonandi gengur betur á þessu kjörtímabili að ræða og ráðast í skynsamlegar umbætur á stjórnarskrá Íslands, rétt eins og henni hefur áður verið breytt í tímans straumi. Má þar sem fyrr horfa til ákveða um umhverfi, auðlindir og íslenska tungu, auk breytinga á þjóðhöfðingjakafla stjórnarskrárinnar,“ sagði Guðni.

Að lokum virtist Guðni vísa til þess að stjórnarskráin gæfi ekki sem besta leiðsögn um hvernig taka bæri á lögmæti kosninga. „Verkefni hér næstu daga benda líka til þess að í fleira megi rýna í þessum efnum.“

Ríkisstjórn Katrínar ætlaði að breyta stjórnarskrá

Í stefnuyfirlýsingu ríkisstjórnarinnar 2017 kom fram að unnið yrði að endurskoðun stjórnarskrárinnar

„Unnið verður að endurskoðun stjórnarskrár lýðveldisins Íslands á grundvelli þess viðamikla starfs sem átt hefur sér stað undanfarin ár. Ríkisstjórnin mun bjóða öllum þingflokkum á Alþingi að skipa fulltrúa í þingmannanefnd sem mun starfa með færustu sérfræðingum á sviði stjórnskipunar að sem bestri sátt um tillögur að breytingum sem verði lagðar fram eigi síðar en árið 2019.
Sérstakt markmið er að breytingatillögur fái góða kynningu og umræðu fyrir framlagningu á Alþingi og vandaða þinglega meðferð sem eftir atvikum verði með opnum fundum. Hugað verði að breytingum á kjördæmaskipan með hliðsjón af þeirri reynslu sem fengist hefur af síðustu breytingum í þeim efnum. Kosningalöggjöf verði yfirfarin samhliða því starfi með það fyrir augum að hún verði einfaldari og miði að meira jafnræði í atkvæðavægi.“

Þingmenn munu sjálfir greiða atkvæði um hvort þeir telji kosninguna lögmæta, sömu kosningu og þeir voru sjálfir kjörnir í.

Í þjóðaratkvæðagreiðslu 20. október 2012 var samþykkt að leggja tillögur stjórnlagaráðs til grundvallar nýrri stjórnarsrká. Stjórnarskráin kveður hins vegar á um að Alþingi þurfi að samþykkja stjórnarskrá. Það hefur ekki gengið eftir. Þá var kveðið á um það í stefnuyfirlýsingu ríkisstjórnar Vinstri grænna, Sjálfstæðisflokks og Framsóknarflokks að vinnu með stjórnarskrána yrði haldið áfram á því kjörtímabili sem nú er lokið. Svo fór að Katrín Jakobsdóttir forsætisráðherra náði ekki sátt um breytingar á stjórnarskrá og lagði ein flokksformanna fram frumvarp um stjórnarskrárbreytingar í janúar síðastliðnum.

Hún kvaðst þá bjartsýn á að ná fram breytingunum. „Ég vona að umræðan í þinginu verði til þess allavega að leiða fram aukna samstöðu um þessi mál,“ sagði hún í samtali við RÚV. Enn hefur ekki verið kynntur nýr stjórnarsáttmáli og því ekki ljóst hvort þar skapist þingmeirihluti um breytingarnar.

Kjósa

Hvernig finnst þér þessi grein? Skráðu þig inn til að kjósa.

Deila

Athugasemdir (4)

Skráðu þig inn til að skrifa athugasemd eða kjósa.

Axel Axelsson skrifaði
23. nóvember 2021 16:25

þessir trúðar hafa ekkert umboð til eins né neins enda patt úr í skurði . . . ég lýsi þennan gjörning ólögmætann . . .

0
Stefán Agnar Finnsson skrifaði
23. nóvember 2021 15:36

Svei þeirri pólitík í stjórnarskrármálinu sem ræður för og lætur stjórnast af öðrum hagsmunum en þjóðarinnar.

0
skrifaði
23. nóvember 2021 15:28

Íslenska spillingin er sannarlega varin af þingbófum Alþingis.

Engar breytingar eru leyfðar á gömlu Grtánu af íslensku Mafíunni...lesist útgerðarmafíunni og leppum þeirra í Kerfinu.

Veljum því sjálfstæðisflokkinn XD ...spillingin er góð.

0
ÁHG

Árni Hafþór Guðnýjarson skrifaði
23. nóvember 2021 15:10

Er kall greyið örlítið að hysja uppum sig buxurnar, hélt kanski að hann væri að hjálpa fjölþreifna bílstjóranum að bóna bíllin.

0

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.