Fámennum en háværum hópi sósíalista hefur tekist að toga íslenska vinstri menn niður í gamaldags skotgrafir stéttabaráttu og þjóðfélagsátaka, segir Óli Björn Kárason, þingmaður Sjálfstæðisflokksins, í aðsendri grein í Morgunblaðinu í dag. Að hans mati verður afleiðingin sú að þjóðfélag frjálsra einstaklinga, sem eru fjárhagslega sjálfstæðir, muni eiga í vök að verjast. „Í kapphlaupi við Sósíalistaflokkinn um lýðhylli freistast æ fleiri vinstri menn og Samfylkingar sérstaklega að tileinka sér þá lífsspeki að sæl sé sameiginleg eymd.“
Í greininni lýsir Óli Björn miklum áhyggjum sínum af því að átakalínur í íslenskum stjórnmálum fyrir komandi kosningar muni markast af því að stjórnmálafólk á vinstri vængnum reyni að ýta undir öfund og tortryggni meðal almennings, að reynt verði að etja kjósendum saman þar sem „stétt gegn stétt, landsbyggð gegn höfuðborg“ verði gerð að átakaflötum.
Ríkið greiðir Sjálfstæðisflokknum 174 milljónir króna
Í grein Óla Björns lýsir hann ýmsum gerðum stjórnmálamanna, svo sem „tækifærissinnanum“ og „lukkuriddaranum“ sem Óli Björn segir að geri sér góða von um að geta gert út á ríkisstjóð, enda sé búið að ríkisvæða stjórnmálaflokkana að stórum hluta og það myndi efnahagslega hvata fyrir pólitíska ævintýramenn. Flokkur Óla Björns, Sjálfstæðisflokkurinn, fær langhæstar greiðslur úr ríkissjóði, í samræmi við kjörfylgi. Á árinu 2021 greiðir ríkissjóður rétt tæpar 730 milljónir króna í framlög til stjórnmálaflokka. Þar af fær Sjálfstæðisflokkurinn í sinn hlut 174 milljónir króna, tæplega fjórðung alls fjárins.
„Í draumaríkinu ríkir jöfnuður, jafnt í biðröðum sem annars staðar“
Óla Birni er staða Samfylkingarinnar sérstaklega hugleikin í skrifum sínum. „Kannski er það ekki tilviljun að Samfylkingin spili æ meira á öfundargenin enda komin í harða samkeppni við Sósíalistaflokkinn,“ skrifar Óli Björn. Sú samkeppni hafi orðið til þess að aðrir vinstrimenn, einkum Samfylkingarfólk ef marka má skrif Óla Bjarnar, fært sig í meira mæli til vinstri í átt að aukinni ríkishyggju.
Þannig safni barátta um jöfn tækifæri ryki í skúffum vinstri manna, skrifar Óli Björn, en í stað þess skuli komið böndum á framtakssemi einstaklinga. Jöfnuður verði alltaf niður á við en ekki upp á við. „Í draumaríkinu ríkir jöfnuður, jafnt í biðröðum sem annars staðar.“
Á þessu ári hefur Sósíalistaflokkur Íslands mælst með fylgi sem nægir til að fá þingmenn inni á Alþingi. Í síðustu skoðanakönnun Gallup mældist flokkurinn með 5,4% fylgi, en Samfylking rúmlega 12%, Vinstri græn tæp 14% og Sjálfstæðisflokkurinn 24% fylgi.
Athugasemdir