Á meðan tæp 1.700 manns hafa skrifað sig á undirskriftalista til stuðnings þess að Ingó Veðurguð flytji brekkusönginn á Þjóðhátíð í Vestmannaeyjum um verslunarmannahelgina, þrátt fyrir fram komnar áskanir kvenna á samfélagsmiðlinum TikTok, hafa yfir 2.300 manns skrifað undir áskorun á þjóðhátíðarnefnd að „endurskoða ekki ákvörðun sína um að afbóka Ingólf Þ. á Þjóðhátíð 2021“ á þeim forsendum að afbókunin sé „afar viðunandi niðurstaða og ósköp eðlileg viðbrögð“.

Hópurinn Öfgar hefur frá því um helgina birt frásagnir af þekktum tónlistarmanni, sem síðar hefur verið tilgreindur sem Ingó Veðurguð, frá yfir þrjátíu konum. Hópurinn hefur sannreynt að sendendur frásagnanna séu til, án þess að hafa forsendur til að sannreyna atburðarásina sérstaklega, en nöfnin eru ekki birt á þeim forsendum að þolendum sé ekki skylt að ganga í gegnum samfélagsumræðuna. Um er að ræða stúlkur og ungar konur sem greina frá ágengni gegn þeim undir lögaldri eða því sem flokkast undir kynferðisbrot.

Eina krafan fyrir að undirskrift sé tekin gild er að nafn og netfang fylgi og því er listinn sannreynanlegur en ekki endilega sannreyndur.

Undirskriftalistann til stuðnings Ingó má sjá hér en þann sem styður ákvörðun þjóðhátíðarnefndar í Vestmannaeyjum má finna hér.

Klofningur í samfélaginu

Mikil skautun eða pólarísering birtist í afstöðu fólks til málsins. Þannig má sjá í netkönnun Stundarinnar, sem setja þarf fyrirvara á vegna áreiðanleika þar sem úrtak er ekki slembivalið og endurspeglar því ekki fyllilega þýðið, að mikill meirihluti er annars vegar „mjög sammála“ ákvörðun Þjóðhátíðarnefndar, eða 64%, eða þá „mjög ósammála“, eða 25%. Fáir eru „frekar sammála“ (4%) eða „frekar ósammála“ (4%). Því er um að ræða svokallaða tvítinda dreifingu sem er lýsandi fyrir klofning í samfélaginu. Þess ber að geta að netkönnun DV sýndi 54% í andstöðu við ákvörðun Þjóðhátíðarnefndar og 46% fylgjandi henni, en aðeins var hægt að svara játandi eða neitandi „Var rétt að taka giggið af Ingó?“. Þátttaka í netkönnun Stundarinnar krefst innskráningar og getur hver innskráður notandi aðeins kosið einu sinni.

Dómstóll eða ekki?

Aðstandendur fyrri listans líta svo á að dómstóll götunnar hafi tekið völdin, en þess síðari að þjóðhátíðarnefnd hafi fulla heimild til þess að bregðast við óánægju með framferði tónlistarmannsins án þess að nauðsynleg forsenda ákvörðunarinnar sé dómsmál gegn honum.

„Það er eðlilegt að þjóðhátíðarnefnd ákveði hverjum skal bjóða að koma fram á Þjóðhátíð og nefndinni ber ekki að leyfa vafasömum mönnum að koma þar fram. Þó engin kæra liggi fyrir er ekki brotið á mannréttindum Ingólfs að afbóka hann,“ segir í rökstuðningi.

Þjóðhátíðarnefnd tilkynnti á föstudag að Ingó Veðurguð myndi stýra brekkusöng á Þjóðhátíð. Þá hafði hópurinn Öfgar þegar boðið fram aðstoð sína við val á tónlistarmanni, samkvæmt frásögn hópsins. Í kjölfar valsins birtust frásagnirnar af reynslu kvenna af Ingó, án þess að tilgreina nafn hans eða nöfn þolenda. Eftir það tilkynnti þjóðhátíðarnefnd á mánudag án málalenginga að Ingó hefði verið afbókaður. Hann hefur sagst ósáttur við ákvörðunina og hótar málsókn á hendur ótilgreindum hópi fólks vegna ásakana.

„Eigum við að trúa öllu sem dætur okkar segja?“

Forsprakki undirskriftasöfnunar er ritstjóri fréttamiðilsins Eyjar.net í Vestmannaeyjum. „Það er ótækt með öllu að dómstóll götunnar stjórni því hverjir komi fram á viðburðum á Íslandi. Engin kæra liggur fyrir og því er engin rannsókn í gangi,“ segir í undirskriftasöfnun hans þar sem skorað er á „þjóðhátíðarnefnd ÍBV að endurskoða ákvörðun sína um að afbóka Ingólf Þórarinsson á Þjóðhátíð 2021“.

„Eigum við að trúa öllu sem dætur okkar segja, en trúa engu sem synir okkar segja? Hvaða skilaboð eru það?“ spyr kona sem búsett er í Noregi. „Menn eru saklausir uns sekt er sönnuð,“ segir annar. Þá rökstyður enn einn áskorandi stuðning sinn með því að „það er ljótt að það sé hægt að hafa mannorð af einhverjum án nokkurra málaferla“. „Skrílmenning á lægsta stigi. Grundvöllur okkar siðmenningar er að sekt þurfi að sanna, ekki afsanna,“ segir sá fjórði.

„Veit hver ég var“

Ingó hefur komið fram í viðtali við fréttavefinn Mannlíf þar sem hann svarar fyrir ásakanir. Hann sagðist hafa drukkið mikið fram að árinu 2018, þegar hann fékk aðstoð vegna drykkjunnar. Þrátt fyrir að hafa drukkið „20-30“ áfenga drykki á venjulegu kvöldi, samkvæmt hans eigin orðum í viðtali á Vísi 2019, muni hann hvað hann hefur gert. „Já, ég veit allavega hvar ég var. Já, ég veit hvað ég hef verið að gera. Það eru ekki svona hlutir eins og búið er að skrifa að ég hafi gert.“

Hann hótar málsóknum. „Ég ætla ekki að láta eyðileggja mannorð mitt svona þannig að ég bregst við þessu eftir réttum leiðum,“ segir hann við Mannlíf. „Þetta er nafnalaust. Ég mun reyna að finna út hvaðan þetta kemur. Það eru bornar á mig ótrúlegar sakir. Ég hef hugmyndir um hvaðan þetta kemur en ég held að það sé ekki gott að fara sömu leið og viðkomandi og saka fólk um einhverja hluti þannig að ég mun fara rétta leið með þetta. Það mun koma í ljós hvaða konur þetta eru. Ég er viss um það.“

Á sama tíma hefur fyrrverandi kærasta hans til sex ára lýst því yfir að hún standi með þolendum, án þess að taka beina afstöðu til málavaxta. „Í rúmlega 6 ár var ég í sambandi með einstaklingi. Allan tímann stóð ég með honum og studdi hann í gegn um alls konar erfiða tíma, af því að það er það sem maður gerir … stendur með makanum sínum og trúir því sem hann segir. Á sunnudaginn las ég yfir 20 frásagnir. Mér leið eins og ég hefði verið kýld í magann, eins og ég gæti ekki andað og þyrfti að kasta upp. Síðan þá hefur mér liðið eins og ég sé að burðast með risastórt grjót ofan á mér. Mér líður einhvern veginn eins og ég beri ábyrgð, sem er auðvitað mjög brenglað þegar viðkomandi einstaklingur gerir það ekki einu sinni sjálfur. Ég ætla ekki að setjast í eitthvað dómarasæti og segja til um hvað sé rétt og rangt. Ég vil bara skila skömminni. Létta á mér og ýta þeirri tilfinningu um að ég beri einhverja ábyrgð í burtu og segja að ég stend með öllum þeim sem hafa orðið fyrir ofbeldi,“ sagði hún í Instagram-story í gær.

Nánar verður rætt við aðstandendur hópsins Öfga í Stundinni á morgun.